Лепельчаніну пагражае да 20 гадоў пазбаўлення волі за распаўсюджванне наркотыкаў

Жыхар Лепеля на пачатку верасня 2025 года ў інтэрнэце шукаў спосабы падпрацоўкі. Знайшоўшы шуканае, 39-гадовы мужчына спакусіўся на магчымасць высокага заробку. Пра наступствы лепельчанін не падумаў, пра што цяпер горка шкадуе.

– Абвінавачваны ў мэсэнджары «Telegram» звязаўся з куратарам інтэрнэт-крамы па продажы наркатычных сродкаў, – расказаў намеснік пракурора Віцебскага раёна Павел Сухаў. – У абавязкі лепельчаніна, сярод іншага, ўваходзіла выкананне даручэнняў аператараў, забеспячэнне мер канспірацыі, а таксама набыццё наркатычных сродкаў і псіхатропных рэчываў, іх расфасоўка, захоўванне, перавозка і раскладка.

Пра супрацьпраўны бізнес, які працягваўся каля трох тыдняў, стала вядома супрацоўнікам праваахоўных органаў.

– У ходзе асабістага ператрусу мужчыны, а таксама агляду яго месца жыхарства і больш за 33 схованак супрацоўнікамі праваахоўных органаў выяўлена і канфіскавана псіхатропнае рэчыва агульнай масай 1696,21 г, – паведаміў Павел Сухаў.

Пракуратура Віцебскага раёна накіравала ў суд крымінальную справу. Жыхару Лепеля інкрымінуюцца незаконныя з мэтай збыту набыццё, захоўванне і перавозка, незаконны збыт асабліва небяспечных псіхатропных рэчываў у буйным памеры, учыненыя арганізаванай групай.

Мужчыну пагражае да 20 гадоў пазбаўлення волі са штрафам.