25 лістапада, Віцебск /Дзіяна Курыло - БЕЛТА/. Лепельскі райвыканкам выстаўляе на продаж адкрытае акцыянернае таварыства "Лепельпрамшвеймабель", паведамілі карэспандэнту БЕЛТА ў аддзеле эканомікі райвыканкама. На таргі выстаўляецца 238 820 штук акцый - 100-працэнтны пакет, які знаходзіцца ў веданні выканкама. Статутны фонд "Лепельпрамшвеймабель" ацэньваецца ў суму крыху больш за Вr1 млрд. Кошт адной акцыі - Br4,2 тыс. Пачатковы кошт продажу ўстаноўлены ў памеры Br3 050 954 100. Як растлумачылі ў выканкаме, гэта першы конкурс па продажы акцый, якія знаходзяцца ў дзяржаўнай уласнасці. Таргі праводзяцца ў адпаведнасці з палажэннем аб парадку правядзення конкурсаў па продажы аб'ектаў прыватызацыі, зацверджаным пастановай Саўміна Беларусі. Умовай продажу з'яўляюцца гарантыя захавання на працягу пяці гадоў з даты заключэння дагавора куплі-продажу акцый профілю дзейнасці таварыства і стварэнне не менш за 100 працоўных месцаў. Інвестару трэба будзе на працягу двух гадоў накіраваць не менш за $100 тыс. на тэхналагічнае пераўзбраенне прадпрыемства. Конкурс пройдзе 23 снежня, заяўкі на яго ўдзел прымаюцца да 7 снежня.-0-

БЕЛТА