Лепельскі хлебазавод. Асартымент на перспектыву

Намеснік старшыні райвыканкама Аксана Церашкова, якая курыруе пытанні эканомікі і прадпрымальніцтва, з'яўляецца частым госцем на прадпрыемствах Лепельшчыны.

На гэты раз аб'ектам увагі Аксаны Анатольеўны стаў філіял Лепельскі хлебазавод ААТ «Віцебскхлебпрам».

Разам з ёй адправіліся памочнік урача-гігіеніста Лепельскага райЦГіЭ Вольга Хацкевіч, якая праводзіла ацэначныя мерапрыемствы ў рамках міждзяржаўнай групы, і карэспандэнт газеты.
Дырэктар філіяла Уладзімір Куранны правёў гасцей па цэхах, расказаў, якія рамонтныя работы вядуцца, што будзе зроблена ў бліжэйшы час, а таксама аб планах на перспектыву.
-- Мы выпускаем сацыяльна значны тавар, без якога не абыходзіцца меню беларусаў. І хоць у нас дастаткова канкурэнтаў, таму што шырокі асартымент хлебабулачных вырабаў прапануюць буйныя сеткі, але ўсё ж у фірменны магазін «Гарачы хлеб» за прадукцыяй прыязджаюць не толькі жыхары горада, але і з сельскай мясцовасці, -- адзначыў Уладзімір Пятровіч.
Пакуль усе звярталі ўвагу на сцены, столі, вокны, а таксама ўдакладнялі, задавалі пытанні, я назірала і фатаграфавала, як «падрастала» цеста, якое хутка набудзе форму, трапіць у спецыяльныя расстойныя шафы, а крыху пазней — у вялікую печ. А потым мы з вамі ўбачым паветраную і румяную, з неверагодным ароматам выпечку ў крамах.
Адзначым, што на прадпрыемстве штомесяц выпускаецца каля 100 тон хлебабулачнай прадукцыі і каля двух-трох тон кандытарскіх вырабаў. Завод пастаўляе сваю прадукцыю як у гандлёвыя кропкі нашага раёна, так і жыхарам суседніх рэгіёнаў – у Чашнікі, Бешанковічы, Навалукомаль і нават Віцебск.
Тут працуюць больш за 90 чалавек. Касцяк калектыву – вопытныя нашчадкі хлебапёкаў.
Так, напрыклад, на хлебабулачным участку нас сустрэла начальнік цэха Людміла Мурашкевіч, якая 35 гадоў працуе на прадпрыемстве. Маладой дзяўчынай прыйшла сюды, так і засталася тут на доўгія гады і без любімай справы сябе не ўяўляе.
Людміла Віктараўна памятае, як шмат гадоў таму назад лепельчане з задавальненнем куплялі бісквітны торт «Дамашні» з павідлам і дробкай. Цяпер ужо такі не выпякаюць. Затое з'явіліся новыя кулінарныя вырабы, якія знікаюць з прылаўкаў крам вельмі хутка. Торт «Вясенні настрой», кекс “Сталічны з разынкамі”,

пірожнае “Какоскі” і “Бушэточачка шакаладная”, торт «Дэзірэ», “Імператрыца новая”, “Паленца”, «Грэчанка», “Палоска з кунжутам”, торт “Казкі Шахерэзады», прысмакі мучныя “Кармэн”, шматлікія віды пернікаў і печыва -- гэтая і іншая выпечка карыстаецца асаблівым попытам у насельніцтва.
Пацвярджаючы факт, што за студзень-кастрычнік гэтага года па філіяле Лепельскі хлебазавод аб'ём вытворчасці прамысловай прадукцыі склаў 113,6 працэнта да узроўню мінулага года. На прадпрыемстве вядуцца работы з гандлёвымі аб'ектамі па павелічэнні аб'ёмаў паставак прадукцыі і пашырэнні асартыменту ў крамах города і раёна. Так, напрыклад, павялічыліся аб'ёмы продажаў у гандлёвай сетцы «Санта», у гандлёвых аб'ектах ЗАТ «Віцебскаграпрадукт», а таксама КУП «Дзіцячы рэабілітацыйна-аздараўленчы цэнтр «Жамчужына» і іншых гандлёвых сетках. Заключаны новыя дагаворы на пастаўку прадукцыі з СУП “Новая Радуга” ў Навалукомлі, ІП Дзмітрыем Дзятко, ТАА «Акстэхнагруп».
Нагадаем, што летам філіялам адкрыты новы гандлёвы аб'ект у вёсцы Стаі, у бліжэйшай перспектыве плануецца адкрыццё яшчэ адной гандлёвай кропкі на вёсцы.
Пашыраны асартымент выпускаемай прадукцыі. З'явілася 3 новых наймення кандытарскіх вырабаў: прысмакі мучныя “Какетка”, «Макавічэк», прысмакі мучныя з карыцай. Водгукі аб навінках добрыя, кожны знайшоў для сябе нешта па густу. Усяго філіялам вырабляецца больш за 30 найменняў кандытарскіх вырабаў і больш за 30 найменняў хлебабулачных вырабаў, у тым ліку булачных 30 відаў прадукцыі, хлебаў — 31 від.
Атрадна, што ў кастрычніку заключаны дагавор на пастаўку прадукцыі ў Расійскай Федэрацыі -- ТАА «ТрансЛайн». Такім чынам, геаграфія жадаючых купляць лепельскі хлеб і кандытарскія вырабы пашыраецца.
Ажыццяўляецца і мадэрнізацыя абсталявання. Так, у лістападзе набыта аўтаматычная лінія фармоўкі дробнаштучных здобных і булачных вырабаў SY-860 коштам 246 тысяч рублёў. …І на гэтым прадпрыемства не збіраецца спыняцца.
Забыла расказаць пра любімы хлеб лепельчан. Па апытаннях жыхароў раёна ў гэтым спісе -- хлебец збожжавы, хлеб "Духмяны" заварны, "Лаватэра" з кмінам, "Вялікі гасцінец", "Браслаўскі край", "Эсэнскі", "Марачанскі" араматны подовы, «Лепельскі», часначны, "Традыцыйны", "Пажытны", "Восеньскі падарунак»… -- асартымент смачнай прадукцыі вельмі разностайны.
***
Як адзначылі намеснік старшыні райвыканкама Аксана Церашкава і спецыяліст райЦГіЭ Вольга Хацкевіч, на прадпрыемстве актыўна вядуцца рамонтныя работы, максімальна

устраняюцца раней адзначаныя заўвагі, прыведзена ў парадак тэхналагічная дакументацыя. Акрамя гэтага, кіраўніцтва філіяла зацікаўлена ў развіцці прадпрыемства, пашырае асартымент выпускаемай прадукцыі і геаграфію паставак.

Наталля Храпавіцкая. Газета "Лепельскі край"