29 сакавіка, Мінск /Вольга Беляўская - БЕЛТА/. Ільновы холдынг плануецца сфарміраваць у Беларусі да 2013 года. Аб гэтым паведаміў сёння журналістам міністр сельскай гаспадаркі і харчавання Міхаіл Русы, перадае карэспандэнт БЕЛТА. Праект комплекснага бізнес-плана развіцця ільновай галіны Беларусі ў 2011-2015 гадах разглядаўся сёння на пасяджэнні Прэзідыума Саўміна. Галаўной арганізацыяй будучага холдынгу стане Аршанскі ільнокамбінат. Акрамя яго ў холдынгавую структуру ўвойдуць яшчэ 29 прадпрыемстваў, у тым ліку 22 ільнозаводы, інстытут ільну, а таксама ільносемстанцыі. "Холдынг мы павінны стварыць недзе ў раёне 2013 года", - сказаў міністр. Да гэтага часу павінна быць наладжана сістэма паставак на Аршанскі ільнокамбінат якаснага доўгага ільнавалакна, з якога плануюць вырабляць тканіны больш высокай якасці. Па словах Міхаіла Русага, тыя арганізацыі, якія ўвойдуць у холдынг, будуць мадэрнізаваны. Прадпрыемствы, якія не трапяць у холдынгавую структуру, плануецца рэструктурызаваць і пераспэцыялізаваць, каб "людзі, якія там працуюць, не засталіся на вуліцы". "Ёсць маленькія завадкі, якія эканамічна неэфектыўныя, там працуе 22-24 чалавекі, - распавёў міністр. - Мы зараз іх перааснашчаем лініямі па перапрацоўцы ільнавалакна, гэта значыць яны робяць стужку, вяроўку і іншыя віды прадукцыі". Акрамя гэтага, у бліжэйшы час у Беларусі плануецца запусціць 4 новыя лініі па вытворчасці ільновага алею. Неабходнае для гэтага абсталяванне ўжо закуплена. На думку Міхаіла Русага, асноўная задача, якая стаіць сёння ў ільновай галіне, - гэта тэхперааснашчэнне яе арганізацый. "Гэта самае праблемнае напрамак, таму кіраўніком дзяржавы ў мінулым годзе пры наведванні Віцебска было дадзена даручэнне перааснасціць галіну, - нагадаў Міхаіл Русы. - Мы адпрацавалі бізнес-план, будзе запушчана 18 новых ліній замежнай вытворчасці". Новыя лініі плануецца выкарыстоўваць з загрузкай у тры змены, што дазволіць павялічыць аб'ёмы вытворчасці ільнапрадукцыі, павысіць яе якасць. "Плануецца вырабляць па гадах 60 тыс.т ільнавалакна, калі спатрэбіцца - будзем пераглядаць гэты аб'ём, - распавёў кіраўнік Мінсельгасхарча. - Да 2015 года выйдзем на перапрацоўку доўгага і кароткага ільнавалакна на ўзроўні 50/50". Ужо ў наступным годзе аграрыі плануюць атрымаць 22-24 тыс.т доўгага ільнавалакна. Гэты аб'ём закрые не толькі патрэбы Аршанскага ільнокамбіната, але і забяспечыць магчымасць экспартаваць дадзеную прадукцыю. -0-