Прэзідэнт Беларусі Аляксандр Лукашэнка павіншаваў Султана Амана Хайсама бен Тарыка Аль Саіда і народ гэтай краіны з Нацыянальным днём. Пра гэта БЕЛТА паведамілі ў прэс-службе беларускага лідара.
"Гэтае свята сімвалізуе мудрасць, згуртаванасць і стваральную сілу, якія рухаюць дзяржаву наперад, захоўваючы вернасць традыцыям. Беларусь з вялікай павагай назірае за высокімі дасягненнямі Султаната і гатова зрабіць свой уклад дзеля яго прагрэсу", - гаворыцца ў віншаванні.
Кіраўнік дзяржавы падкрэсліў трывалую сувязь, якая існуе паміж Беларуссю і Аманам. "З асаблівай цеплынёй успамінаю сустрэчы з Вамі - у снежні 2024 года ў Маскаце і ў кастрычніку 2025 года ў Мінску. Двухбаковы дыялог стаў па-сапраўднаму гістарычным і пачаў новую старонку ў беларуска-аманскіх адносінах", - адзначыў беларускі лідар.
Аляксандр Лукашэнка звярнуў увагу, што Беларусь і Аман разам заклалі надзейны фундамент для шматпланавага партнёрства - ад нарошчвання таваразвароту ў сферах прамысловасці, сельскай гаспадаркі, харчовай бяспекі, фармацэўтыкі да стварэння сумес ных вытворчасцяў. Якасны імпульс атрымала інвестыцыйная дзейнасць, пашырылася ўзаемадзеянне ў сферах культуры, адукацыі і турызму, дадаў ён.
"Усе названыя напрамкі адлюстроўвае падпісаная ў кастрычніку 2025 года Дарожная карта па развіцці двухбаковага супрацоўніцтва паміж Рэспублікай Беларусь і Султанатом Аман. Разлічваю на актыўную працу абодвух бакоў па выкананні гэтага праграмнага дакумента пад кіраўніцтвам Сумеснага камітэта па супрацоўніцтве і інвестыцыях", - падкрэсліў Прэзідэнт.
Аляксандр Лукашэнка пажадаў Хайсаму бен Тарыку Аль Саіду здароўя, натхнення і новых поспехаў у служэнні Радзіме: "Няхай Султанат Аман і надалей квітнее пад Вашым дальнабачным кіраўніцтвам, а дружба паміж нашымі краінамі толькі мацнее".