Прэзідэнт Беларусі Аляксандр Лукашэнка асабіста праверыў баявую гатоўнасць Узброеных Сіл. Кіраўнік дзяржавы ў рамках раптоўнай праверкі наведаў 227-ы агульнавайсковы палігон у Барысаўскім раёне, перадае карэспандэнт БЕЛТА.
Кіраўнік дзяржавы па прыбыцці заслухаў даклад аб ходзе праверкі баявой гатоўнасці злучэнняў і воінскіх часцей, якая праводзіцца па плане Мінабароны і Генштаба. Падрабязнасці расказаў міністр абароны Віктар Хрэнін, якога толькі а 7 раніцы папярэдзілі аб нечаканым прыездзе Прэзідэнта. Цяпер гэтая праверка праводзіцца паралельна, не дублюючы задачы, якія ставяцца ў рамках раптоўнай праверкі па лініі Прэзідэнта і Дзяржаўнага сакратарыята Савета бяспекі.
Міністр, у прыватнасці, далажыў, што дыслакаваная ў Гродне 6-я асобная гвардзейская механізаваная брыгада прыведзена ў павышаную баявую гатоўнасць. У такім аб'ёме брыгада яшчэ ні разу не правяралася. "Брыгада будзе цалкам адмабілізавана да штатаў ваеннага часу. На сённяшні момант прызваны ваеннаабавязаныя запасу ў полк рэзерву Заходняга аператыўнага камандавання, - сказаў кіраўнік ваеннага ведамства. - У адпаведнасці з новай методыкай, зыходзячы з досведу і праблемных пытанняў, якія мы выявілі падчас праверак 19-й і 11-й брыгад, мы ўбачылі, што неабходны папераджальны прызыў афіцэраў запасу і правядзенне заняткаў з імі".
На мінулым тыдні быў ажыццёўлены такі папераджальны прызыў афіцэраў запасу ў колькасці 400 чалавек.
"Усіх прызвалі ці кагосьці не знайшлі?" - удакладніў Аляксандр Лукашэнка.
"Усіх - 100%. Дарэчы, адзначаюць, што людзі цяпер з вялікім жаданнем. Менш было жадаючых дзесьці ўцячы, знайсці нейкую прычыну. Нават зваротаў не было", - заўважыў Віктар Хрэнін.
З гэтай нагоды Аляксандр Лукашэнка зрабіў выснову: "Значыць, людзі сур'ёзна ставяцца да прызыву. Ну нарэшце зразумелі, што гэта вучоба: а калі вайна - а мы нічога не ўмеем рабіць".
Аляксандр Лукашэнка таксама пацікавіўся папярэднімі вынікамі і ўражаннямі ад першага этапу раптоўнай праверкі баявой гатоўнасці, якая праводзіцца па яго даручэнні. "Армія здольная ваяваць. У цэлым усе камандзіры брыгад, якія атрымалі вашае распараджэнне, задачу дакладна ўсвядомілі, прынялі рашэнні аб здзяйсненні маршаў ва ўказаныя раёны. Маршы ўсе здзейснілі, на маршы нікога не страцілі", - далажыў дзяржаўны сакратар Савета бяспекі Аляксандр Вальфовіч.
Паводле яго слоў, былі адзінкавыя выпадкі няспраўнасцей. Але машыны на маршы рамантавалі сваімі сіламі, не прыцягваючы часткі цэнтральнага падпарадкавання. "З спазненнем на гадзіну-паўтары дзве-тры машыны даходзілі ў раён. Гэта не ўплывала на выкананне баявой задачы той ці іншай воінскай часткай у цэлым. Ёсць пытанні па дысцыпліне маршу, па некаторых разліках. Але гэта вучэбныя пытанні, якія мы прааналізуем і правядзем дэтальны разбор", - адзначыў дзяржсакратар Савета Бяспекі.
Кіраўнік дзяржавы наведаў камандна-назіральны пункт батальёна ў раёне засяроджвання, дзе пагутарыў з вайскоўцамі, азнаёміўся з выкананнем мерапрыемстваў праверкі. У тым ліку размова ішла пра тое, як уладкаваны побыт салдат.
Прэзідэнт падкрэсліў важнасць правядзення падобных праверак, каб падтрымліваць на высокім узроўні вывучку войскаў. "Праверку праходзяць усе. І нават міністр абароны і дзяржсакратар. Ёсць людзі, якія за імі таксама назіраюць і мне дакладваюць, - адзначыў Аляксандр Лукашэнка. - Цяпер зіма такая, што праверцы падвергнем усіх".
"Хлопцы, вы павінны вучыцца сваёй справе. Абавязкова. Той, хто не падрыхтаваны, - гэта смяротнік. У нас ніхто пытацца не будзе, калі і як ваяваць. Наадварот, будуць шукаць магчымасць атакаваць нас нечакана. Я не кажу, што гэта заўтра будзе. Але і не магу сказаць, што гэтага не будзе наогул. Таму мы рыхтуемся", - заўважыў беларускі лідар, кажучы пра неабходнасць быць гатовымі да любога развіцця падзей.
Побываў кіраўнік дзяржавы і ў бліндажы, дзе размяшчаецца асабовы склад. Умовы хоць і паходныя, але ў выпадку ваеннага часу больш чым прымальныя. "У вас тут курорт", - заўважыў Аляксандр Лукашэнка, успомніўшы, як у гады яго службы даводзілася "ваяваць" на вучэннях і ў больш суровых умовах.
У ходзе наведвання палігона былі таксама абмеркаваны пытанні аснашчэння воінскіх злучэнняў сучаснай тэхнікай, падыходы ў вырашэнні кадравых пытанняў. Прэзідэнт падкрэсліў, што салдаты павінны быць забяспечаны ўсім неабходным, каб выконваць свае задачы.
"Вучыцеся, вучыцеся. На ўсялякі выпадак вучыцеся. Будзеце ўмець усё рабіць - будзеце жыць", - напуціў вайскоўцаў кіраўнік дзяржавы.
Прэзідэнт на палігоне наведаў стрэльбішча, дзе праходзілі вучэбныя стрэльбы з гранатамёта і аўтаматычнай зброі. Планавалася таксама выканаць вучэбныя стрэльбы з узбраення бронетранспарцёраў, аднак густы туман унёс свае карэктывы. Але і ў ваенны час у гэтых умовах задзейнічаць дадзеную тэхніку было б мэтазгодна, бо мэты не бачныя.
"Трэба чакаць тады. Чакайце, праводзіце па плане. Што мы будзем страляць у белы свет..." - сказаў кіраўнік дзяржавы.
Падводзячы вынікі, Аляксандр Лукашэнка адзначыў, што хацеў убачыць на свае вочы, наколькі войскі падрыхтаваны для вядзення баявых дзеянняў.
"Ну, радасці мала, будзем так шчыра казаць. Страляюць, бачаць мішэні. Будзем лічыць, што так сабе, - сказаў кіраўнік дзяржавы. - Хвалююцца, вядома, - Прэзідэнт стаіць за спіной. Я разумею, што хваляванне пэўнае ёсць. Ну, так на так - дзесьці трапілі, дзесьці прамахнуліся".
Важна адзначыць, што да стрэльбаў прыцягвалася не спецыяльна падабраная каманда, а вайскоўцы ў парадку спісу і незалежна ад тэрміну службы і досведу.
"Няхай працуюць далей. Мы паглядзім, як тваё жыццё ўскладніць. Мы табе ўскладняць будзем зараз жыццё. Так што не расслабляйся. Ну а з комбатаў, вядома, шкуру будзем па-мужчынску дзяраць", - дадаў Прэзідэнт, звяртаючыся да міністра абароны.
Як паведамлялася БЕЛТА, маштабная праверка Узброеных Сіл па даручэнні Прэзідэнта Беларусі пачалася 16 студзеня. Першачарговая мэта - убачыць аб'ектыўную карціну, рэальны стан войскаў, ацаніць дзеянні вайскоўцаў. Менавіта таму мерапрыемствы носяць раптоўны характар. Ключавой асаблівасцю праверкі з'яўляецца яе арганізацыя. Кіраўнік дзяржавы прыводзіць у баявую гатоўнасць воінскія часткі, мінуючы Міністэрства абароны і Генеральны штаб.
Прэзідэнт падпісвае распараджэнне пад грыфам "сакрэтна", у якім паказаны задум маючай адбыцца праверкі. Дзяржсакратар Савета бяспекі Аляксандр Вальфовіч атрымлівае закрыты пакет з дакументам, пасля чаго выязджае ў вызначаную кіраўніком дзяржавы воінскую частку. Па даручэнні беларускага лідара да правядзення праверкі таксама быў прыцягнуты старшыня КДК Васіль Герасімаў.
Аляксандр Лукашэнка трымае ход праверкі на асабістым кантролі, рэгулярна заслухоўвае даклады дзяржаўнага сакратара Савета бяспекі.
Кіраўнік дзяржавы на нарадзе 3 лютага патлумачыў сістэму, па якой выбудавана праверка, наступным чынам: "Я ўсім давяраю. Але гэта - раптоўная праверка, якую праводзіць галоўнакамандуючы. І я хачу паглядзець, як у гэтай раптоўнай праверцы будуць дзейнічаць Генштаб і Мінабароны".
Першай была праверана воінская часць тэхнічнага забеспячэння - адна з найбуйнейшых воінскіх часцей Узброеных Сіл, дзе стаяць на захоўванні розныя ўзоры бранятанкавага ўзбраення і ваеннай тэхнікі. У ліку воінскіх часцей, якія падвергліся праверцы, - 19-я асобная гвардзейская механізаваная брыгада, 72-і гвардзейскі аб'яднаны навучальны цэнтр, 38-я асобная гвардзейская дэсантна-штурмавая брыгада, 103-я Віцебская паветрана-дэсантная брыгада, 120-я асобная гвардзейская механізаваная брыгада, 11-я асобная гвардзейская механізаваная брыгада.
Пры правядзенні праверкі ўлічваецца вопыт вядзення баявых дзеянняў у сучасных ваенных канфліктах. Яе вынікі будуць пакладзены ў аснову ўдасканалення беларускай арміі.
belta.by
