9 чэрвеня, Мінск /Кар. БЕЛТА/. Галоўная задача дзяржаўных органаў сістэмы забеспячэння нацыянальнай бяспекі – захаваць стабільнасць у краіне, забяспечыць законнасць і правапарадак.
9 чэрвеня, Мінск /Кар. БЕЛТА/. Галоўная задача дзяржаўных органаў сістэмы забеспячэння нацыянальнай бяспекі – захаваць стабільнасць у краіне, забяспечыць законнасць і правапарадак. На гэта звярнуў увагу Прэзідэнт Беларусі Аляксандр Лукашэнка падчас нарады па пытаннях дзейнасці дзяржаўных органаў сістэмы забеспячэння нацыянальнай бяспекі, перадае карэспандэнт БЕЛТА.
"Дэмакратыя дэмакратыяй, але бязмежжа быць не павінна. І не будзе. Вы бачылі ў Злучаных Штатах, Заходняй Еўропе, як супердэмакратычныя дзяржавы (якія, дарэчы, нас вучылі дэмакратыі) абышліся з пратэстуючымі. Галоўная задача дзяржаўных органаў сістэмы забеспячэння нацыянальнай бяспекі – захаваць стабільнасць у краіне, забяспечыць законнасць і правапарадак. Тое, што ад вас патрабуюць Канстытуцыя і закон", - сказаў Аляксандр Лукашэнка.
Па словах кіраўніка дзяржавы, для абмеркавання на нараду вынесены многія пытанні, але асноўная ўвага будзе нададзена правядзенню выбарчай кампаніі і выбараў Прэзідэнта Беларусі. "Усяго тры тыдні як стартавала гэтая выбарчая кампанія, але ўжо сёння мы бачым, што далёка не ўсе кандыдаты ў кандыдаты маюць намер прайсці гэты шлях цывілізавана. Наўкола парушэнні заканадаўства, больш таго, этычных нормаў, абразы, выпады ў бок улады. Ёсць і такія, хто лічыць, што для дасягнення мэты ўсе сродкі добрыя, - заўважыў Аляксандр Лукашэнка. - Тое, што ў барацьбе за сімпатыі насельніцтва яны выкарыстоўваюць выключна папулісцкія лозунгі і нічым не падмацаваныя абяцанні, - гэта хай разбіраюцца самі людзі. Яны прааналізуюць, зробяць адпаведныя высновы. Народ разбярэцца".
Прэзідэнт звярнуў увагу на недапушчальнасць ператварэння збору подпісаў у несанкцыянаваныя мітынгі і масавыя мерапрыемствы з парушэннем усіх магчымых і немагчымых законаў і нормаў маралі. "Дапусціць парушэнні закона нельга: потым нам давядзецца за гэта вельмі дорага заплаціць. Вы ведаеце, як падобная сітуацыя развівалася ва Украіне. Таму закон і яшчэ раз закон. Ён павінен быць бездакорна выкананы", - падкрэсліў кіраўнік дзяржавы.
Аляксандр Лукашэнка запатрабаваў прыцягваць да адказнасці і за факты агрэсіўных дзеянняў у дачыненні да прадстаўнікоў органаў правапарадку. Паводле яго слоў, пагрозы паступаюць не толькі людзям у пагонах. "Пагрозы сёння сыплюцца з усіх бакоў: на адрас дзяржаўных служачых, кіраўнікоў участковых камісій, якія праводзілі парламенцкія выбары, на адрас іх сем'яў. З усіх бакоў пагрозы. Гэта што такое? Я папрашу праваахоўныя органы, асабліва генеральнага пракурора, старшыню Следчага камітэта, міністра ўнутраных спраў, звярнуць на гэта самае сур'ёзнае ўвагу. Калі ідуць пагрозы - гэта крымінальнае парушэнне, якое пераследуецца па крымінальным праве", - звярнуў увагу Прэзідэнт.
Ён адзначыў, што ўсе падзеі развіваюцца па загадзя прадуманым сцэнарыі, прычым іх удзельнікі - усяго толькі выканаўцы, у якіх ёсць гаспадары з грашыма. "Спачатку прадстаўнікі шэрагу ініцыятыўных груп злоўжываюць правам на правядзенне пікетаў для раскачвання сітуацыі і дэстабілізацыі грамадска-палітычнай абстаноўкі, потым яны сфармуюць каманды і групы баевікоў, якія, не выключана, захочуць арганізаваць пабоішча на плошчы. Да гэтага яны і заклікаюць людзей. Чаму тут здзіўляцца? Чаго так усе здзіўляюцца: "як Лукашэнка адкажа"? Адказ будзе адзін, вы выдатна разумееце", - папярэдзіў кіраўнік дзяржавы.
На думку Аляксандра Лукашэнкі, гэта так званыя сучасныя перадвыбарчыя тэхналогіі, якія часта не адрозніваюцца чысцінёй. "Мы гэта ўжо праходзілі. Мы не дапусцілі расколу тады ў грамадстве, не дапусцім і цяпер. І сёння маем намер прыняць адэкватныя меры, каб захаваць мір і стабільнасць у нашай дзяржаве, - падкрэсліў беларускі лідар. - Для гэтага трэба выразна разумець, на што гатовыя пайсці асобныя кандыдаты ў кандыдаты для дасягнення сваёй мэты. Якія рэсурсы яны задзейнічаюць для павышэння свайго рэйтынгу. Ці не створыць гэта дадатковыя пагрозы?"
Прэзідэнт пацікавіўся ў удзельнікаў нарады, як яны ацэньваюць сітуацыю, якая складваецца, і якія ў іх ёсць прапановы па ўмацаванні стабільнасці "з улікам верагоднасці абвастрэння сітуацыі на любым этапе выбарчага працэсу". "Нашым людзям не варта залішне напружвацца і перажываць. Мы павінны забяспечыць кожнаму чалавеку магчымасць спакойна хадзіць па сваёй зямлі, а бацькам, як гэта заўсёды было ва ўсіх нашых гарадах, - спакойна не проста хадзіць па зямлі, а з маленькімі дзецьмі за руку ў любы час сутак, і ганарыцца сваёй краінай. Краіна павінна быць спакойнай, не гледзячы ні на якія вострыя сітуацыі. Гэта галоўнае, што адрознівае нас ад іншых. У гэтым сутнасць нашага астраўка бяспекі. І гэта мы павінны захаваць, чаго б нам гэта ні каштавала", - рэзюмаваў Аляксандр Лукашэнка.