Прэзідэнт Беларусі Аляксандр Лукашэнка павіншаваў юнакоў і дзяўчат з Днём моладзі і студэнцтва, паведамілі БЕЛТА ў прэс-службе кіраўніка дзяржавы.

"Гэта яркае і светлае свята ўвасабляе мары аб вялікіх здзяйсненнях. Менавіта ў маладосці вызначаецца наш шлях. Выбар прафесіі, стварэнне сям'і, нараджэнне дзяцей - найважнейшыя падзеі, якія закладваюць фундамент паспяховага жыцця. Шануйце кожнае імгненне, напаўняйце кожны дзень падзеямі і дасягненнямі, апраўдвайце званне самай актыўнай і мэтанакіраванай часткі грамадства. Вашы энергія, аптымізм, шчырасць, жаданне працаваць на карысць Радзімы служаць залогам развіцця і росквіту Беларусі", - гаворыцца ў віншаванні.
 
Аляксандр Лукашэнка заўважыў, што свет, які імкліва змяняецца, чакае ад маладых людзей рашучых крокаў і ўчынкаў.
 
"Увасабляйце ў жыццё самыя смелыя ідэі і задумы. Будзьце годнымі сваіх вялікіх продкаў. Прымнажайце багацці роднай зямлі, умацоўвайце народнае адзінства, захоўвайце гістарычную памяць і нацыянальныя традыцыі. Няхай кожны знойдзе сваё прызванне і годна праявіць сябе на абраным шляху", - пажадаў Прэзідэнт.

belta.by