Гандлёва-эканамічнае ўзаемадзеянне Беларусі з Уладзімірскай вобласцю Расіі нарастае, і тэмп гэтага росту трэба любой цаной захаваць. Пра гэта Прэзідэнт Беларусі Аляксандр Лукашэнка заявіў на сустрэчы з губернатарам Уладзімірскай вобласці Расіі Аляксандрам Аўдзеевым, перадае карэспандэнт БЕЛТА.
Кіраўнік дзяржавы прывітаў кіраўніка расійскага рэгіёна ў горадзе-героі Мінску і, перш чым пачаць гутарку, павіншаваў усіх са светлым і святым святам - Днём Перамогі, чарговая гадавіна якога адзначалася на мінулым тыдні. "Гэта вялікае дасягненне нашага народа. Чарговая гадавіна гэтай Вялікай Перамогі - я думаю, мы яе заслужылі і свята будзем берагчы", - падкрэсліў Прэзідэнт.
"Перакананы, што ваш першы візіт у нашу краіну ў статусе кіраўніка расійскага рэгіёна дазволіць на месцы больш хутка вызначыцца з патрэбамі, знайсці патрэбных пастаўшчыкоў, а можа, і заключыць новыя кантракты, - звярнуўся Аляксандр Лукашэнка да Аляксандра Аўдзеева. - Наш урад арыентаваны на тое, каб аказаць вам максімальнае садзейнічанне. Словам, усё, на што мы здольныя, калі вас задавальняе, мы гатовы з вамі ў гэтым напрамку працаваць".
Прэзідэнт нагадаў, што падчас кантактаў на вышэйшым узроўні з Прэзідэнтам Расіі Уладзімірам Пуціным пастаянна ідзе размова аб неабходнасці паглыблення інтэграцыі, вытворчай кааперацыі і, самае галоўнае, імпартазамяшчэння. "Вы ведаеце, у нас нядрэнна атрымліваецца. Нават больш таго, што мы чакалі, - сказаў беларускі лідар. - Лічу, у гэтым у першую чаргу павінны быць зацікаўлены кіраўнікі рэгіёнаў і прадпрыемстваў, таму што вы на месцы, там, з людзьмі".
Усё, што неабходна было прыняць і падпісаць, кіраўнікамі дзяржаў, урадамі ў асноўным зроблена, канстатаваў Аляксандр Лукашэнка. "Адкрыта шырокая дарога для таго, каб рэалізаваць тыя задумкі, якія мы меркавалі, у сферы двухбаковага супрацоўніцтва", - заўважыў ён.
Па словах Прэзідэнта, у 2022 годзе ўзаемны гандаль дасягнуў свайго найвышэйшага з 2017 года ўзроўню, склаўшы амаль паўмільярда долараў, і ў параўнанні з 2021-м павялічыўся амаль на 20%. Па трох месяцах гэтага года таксама адзначаецца станоўчая дынаміка: у параўнанні з аналагічным перыядам 2022 года таваразварот павялічыўся амаль на траціну. "Чаго б гэта ні каштавала, нам гэтыя тэмп трэба захаваць", - паставіў задачу кіраўнік дзяржавы. Пры гэтым ён звярнуў увагу, што часта бываюць сітуацыі, калі за ростам гандлю ідуць спады. А такіх рэзкіх перападаў быць не павінна, перакананы Прэзідэнт.
"Мы пастаўляем вам цяпер і маем намер прапаноўваць далей прадукцыю машынабудавання, станкабудавання, дрэваапрацоўкі, хімічнай і лёгкай прамысловасці, аграпрамысловага комплексу", - сказаў кіраўнік дзяржавы. Па яго словах, Уладзімірская вобласць таксама можа разлічваць на супрацоўніцтва з Беларуссю ў шэрагу сфер, у тым ліку па пастаўках племянной жывёлы, меліярацыйнай тэхнікі. У нашай краіне, у сваю чаргу, добра ведаюць і выкарыстоўваюць прадукцыю хімічнай прамысловасці, машынабудавання і станкабудавання, прадукты харчавання з расійскага рэгіёну.
"Айчынная пасажырская, грузавая, сельскагаспадарчая, камунальная, дарожна-будаўнічая тэхніка, ліфтавае абсталяванне адпавядаюць узроўню сусветных стандартаў. Іх якасць і надзейнасць правераны шматгадовай эксплуатацыяй. Мадэльны шэраг і асартымент пастаянна абнаўляюцца. Таму - да вашых паслуг. Мы вам пакажам усё тое, што вас цікавіць. Спадзяюся, падчас свайго знаходжання ў Беларусі вы з калегамі вызначыцеся, што менавіта з тэхнікі сёння Уладзімірскай вобласці неабходна, і мы ў найкароткія тэрміны паставім гэту тэхніку вам", - адзначыў кіраўнік дзяржавы.
Аляксандр Лукашэнка таксама звярнуў увагу на падабенства Беларусі і Уладзімірскай вобласці, што з'яўляецца надзейным фундаментам для развіцця двухбаковага ўзаемадзеяння: "Гэта родная наша вобласць, яна такая, як Беларусь. Ведаем, што вы не супербагатыя (так жа, як і мы), усё дастаецца сваёй працай, людзі аднолькавыя. Таму ў нас ёсць добрая база, аснова для нашага супрацоўніцтва. Заўсёды да гэтага гатовыя".
Гандлёва-эканамічнае супрацоўніцтва Беларусі з Уладзімірскай вобласцю Расіі характарызуецца станоўчай дынамікай. За 2022 год аб'ём таваразвароту склаў амаль $414 млн. Гэта на 20% больш за паказчык за 2021-ы і найбольшы аб'ём за перыяд з 2017 года. У студзені - сакавіку гэтага года тэндэнцыя да росту ўзаемнага гандлю захоўваецца: $93,4 млн, што на 32% перавышае ўзровень за аналагічны перыяд 2022 года.
Беларускі экспарт ва Уладзімірскую вобласць за мінулы год склаўся ў аб'ёме $130 млн, павялічыўшыся за год больш чым на 46%. У яго аснове - прылады на вадкіх крышталях, лазеры, часткі рухомага саставу, смалы і поліўрэтаны, шклавалакно і вырабы з яго, нетканыя матэрыялы. Імпартуюцца ў Беларусь з гэтага расійскага рэгіёну медны дрот, часткі рухомага саставу, шакалад і гатовыя харчовыя прадукты з какава, спецыфічныя тавары, кандытарскія вырабы з цукру.
Крыніца: belta.by