Прэзідэнт Беларусі Аляксандр Лукашэнка павіншаваў кіраўнікоў, работнікаў і ветэранаў ААТ "Завод "Легмаш" з 80-годдзем з дня ўтварэння прадпрыемства. Пра гэта БЕЛТА паведамілі ў прэс-службе беларускага лідара.
Характэрна, што гісторыя завода пачыналася ў пераможным 1945 годзе і стала летапісам паступальнага развіцця і абнаўлення, адзначыў кіраўнік дзяржавы.
"Аршанскае прадпрыемства прайшло шлях ад вельмі патрэбных у цяжкія пасляваенныя гады ацяпляльных катлоў і бытавых швейных машын да высокатэхналагічнага нафтагазавага і энергетычнага абсталявання, - гаворыцца ў віншаванні. - Пры гэтым візітнай карткай "Легмаша" заўсёды заставаліся прафесіяналізм работнікаў і найвышэйшая якасць прадукцыі, якая вырабляецца".
Прэзідэнт звярнуў увагу, што цяпер завод зрабіў яшчэ адзін важны крок - завершаны чарговы этап маштабнай рэканструкцыі і паспяхова асвоены выпуск абароннай прадукцыі. "Чаpговы раз даказалі, што калектыву па плячы самыя складаныя задачы, звязаныя з імпартазамяшчэннем і інавацыямі, - падкрэсліў Аляксандр Лукашэнка. - Перакананы, што наперадзе ў завода, які ўносіць значны ўклад у эканоміку краіны і аршанскага рэгіёну, яшчэ будуць і іншыя патрэбныя краіне тэхналагічныя прарывы і вялікія дасягненні".
Кіраўнік дзяржавы пажадаў усім работнікам і ветэранам ААТ "Завод "Легмаш" моцнага здароўя, шчасця, міру, дабра і новых вытворчых поспехаў.