Прэзідэнт Беларусі Аляксандр Лукашэнка падзякаваў Федэрацыю прафсаюзаў за актыўны ўдзел у парламенцкай выбарчай кампаніі. Пра гэта кіраўнік дзяржавы заявіў на сустрэчы са старшынёй ФПБ Міхаілам Ордам, перадае карэспандэнт БЕЛТА.
"Вельмі многае залежала ад арганізаванасці правядзення гэтай кампаніі, і прафсаюзы ўнеслі годны ўклад у яе арганізацыю, - сказаў Прэзідэнт. - Мы дамаўляліся, што прафсаюзы прымуць актыўны ўдзел у кампаніі, дапамогуць яе арганізаваць на месцах, што і было зроблена".
Аляксандр Лукашэнка падкрэсліў ролю ФПБ у грамадска-палітычным жыцці краіны, назваўшы арганізацыю адной з самых шматлікіх. "Аснову складаюць людзі, якія працуюць, а не займаюцца палітыканствам, хаджэннем па чыстых і ўтульных мінскіх вуліцах", - адзначыў ён.
Падчас сустрэчы абмяркоўваўся таксама ход падрыхтоўкі да восьмага з'езда Федэрацыі прафсаюзаў Беларусі, які плануецца правесці ў канцы лютага.
Аляксандр Лукашэнка даручыў кіраўніку Адміністрацыі Прэзідэнта і ўраду падключыцца да працэсу падрыхтоўкі гэтага мерапрыемства. "Калі патрэбна будзе падтрымка на месцах, каб маглі арганізаваць выбары дэлегатаў, каб гэта было дэмакратычна і прыстойна, каб потым пальцам не тыкалі, бо жадаючых жа шмат. Нават пасля сённяшняй размовы пачнуць абвінавачваць прафсаюзы, што яны ўжо партыяй сталі і ледзь ці не галоўную ролю гуляюць у палітычным працэсе. На гэтым не зацыклівайцеся, вы чалавек дасведчаны, я гэта ведаю", - падкрэсліў кіраўнік дзяржавы.