Прэзідэнт Беларусі Аляксандр Лукашэнка 2 красавіка падпісаў Дырэктыву №11 "Аб удасканаленні функцыянавання сістэмы органаў улады і кіравання, узмацненні выканаўчай дысцыпліны". Пра гэта БЕЛТА паведамілі ў прэс-службе беларускага лідара.
Дакумент прыняты ў развіццё указаў "Аб пяцігодцы якасці", "Аб узмацненні ролі старшынь выканаўчых камітэтаў базавага ўзроўню ў развіцці рэгіёнаў" і накіраваны на кардынальнае павышэнне эфектыўнасці функцыянавання сістэмы органаў дзяржаўнай улады, кіраўніцкай дзейнасці, узмацненне выканаўчай дысцыпліны, сацыяльна адказнага стаўлення кожнага да працы.
У адпаведнасці з Дырэктывай недапушчальна ўмяшанне дзяржаўных органаў, службовых асоб у кампетэнцыю адзін аднаго. Выключаецца фарміраванне і функцыянаванне саветаў, камісій, груп, іншых экспертных і кансультатыўна-дарадчых структур, якія падмяняюць дзяржаўныя органы, акрамя непасрэдна прадугледжаных заканадаўчымі актамі. Забараняецца неабгрунтаванае правядзенне нарад, у тым ліку ў дыстанцыйным фармаце.
Дакументам прадугледжваецца ўкараненне ў практычную дзейнасць сучасных лічбавых тэхналогій у дзяржаўным кіраванні, павышэнне эфектыўнасці службовых камандзіровак, правядзенне абавязковай ацэнкі стану выканаўчай дысцыпліны ў дзяржаўным органе, улік яе пры падаўжэнні або заключэнні з кіраўніком гэтага органа кантракту на новы тэрмін, прыняцці рашэнняў па выніках атэстацыі дадзенага кіраўніка, павышэнні яго ў пасадзе, прадстаўленні да дзяржаўных узнагарод.
Дырэктыва змяшчае нормы аб неабходнасці ўпарадкаваць працэс збору інфармацыі і скараціць залішнія запыты ў адрас юрыдычных асоб, а таксама забяспечыць інфармацыйную бяспеку.