Прэзідэнт Беларусі Аляксандр Лукашэнка падпісаў закон, якім комплексна карэктуецца Кодэкс аб адукацыі. Пра гэта БЕЛТА паведамілі ў прэс-службе беларускага лідара.
У дакумент уключаны нормы, накіраваныя на павышэнне эфектыўнасці, якасці і даступнасці адукацыі, пашырэнне дзяржаўнай абароны навучэнцаў, маладых спецыялістаў і сацыяльна ўразлівых катэгорый дзяцей і моладзі, а таксама на ўзмацненне адказнасці суб'ектаў адукацыйных адносін.У прыватнасці, урад надзяляецца паўнамоцтвамі на пераразмеркаванне і перанакіраванне на працу маладых спецыялістаў, прадастаўленне ім дадатковых сацыяльных гарантый, а мясцовыя органы ўлады – на арганізацыю бясплатнай перавозкі навучэнцаў у межах населеных пунктаў да месцаў правядзення адукацыйных, спартыўных, культурных і іншых мерапрыемстваў.
Школам, размешчаным у пасёлках гарадскога тыпу і сельскіх населеных пунктах, прадастаўляецца магчымасць ажыццяўляць падрыхтоўку кіроўцаў механічных транспартных сродкаў і самаходных машын.
Пералік дзяцей, якія маюць пераважнае права пры прыёме ў санаторныя школы-інтэрнаты, дапоўнены катэгорыяй "дзеці-інваліды" да 18 гадоў у мэтах іх сацыяльнай падтрымкі.
Права на атрыманне гранта на падрыхтоўку да паступлення ў беларускія ўстановы адукацыі прадастаўлена замежнікам.
У лік педагагічных работнікаў уключаны прыёмныя бацькі і бацькі-выхавальнікі ў мэтах павышэння іх статусу.
Закрэплена патрабаванне да навучэнцаў школ прытрымлівацца дзелавога стылю ў адзенні.
Законам прадугледжаны таксама іншыя нормы, якія карэктуюць дзяржаўную палітыку ў сферы адукацыі з улікам тэндэнцый развіцця сучаснай адукацыйнай прасторы і практыкі прымянення дзеючага кодэкса.