Прэзідэнт Беларусі Аляксандр Лукашэнка наведвае сёння РУП "Завод газетнай паперы" у Шклове, паведамляе БЕЛТА
Кіраўніку дзяржавы даложаць аб ходзе рэалізацыі інвестыцыйнага праекта "Стварэнне вытворчасці паперы-асновы для дэкаратыўных абліцавальных матэрыялаў прадукцыйнасцю 30 тыс. т у год". Размова ў тым ліку пойдзе аб сацыяльна-эканамічным развіцці Магілёўскай вобласці і Шклоўскага раёна.
Прэзідэнт таксама азнаёміцца з арганізацыяй работы вытворчасці.
Завод газетнай паперы ў 2019 годзе вырабіў прамысловай прадукцыі ў фактычных цэнах на Br75,7 млн, што на 17,7% больш у параўнанні з 2018 годам. У мінулым годзе прадпрыемства вырабіла 53,4 тыс. т паперы і кардону (рост на 27,1%). Амаль 65% вартаснага аб'ёму прадукцыі пастаўляецца на знешнія рынкі (у 2019 годзе - на рынкі 42 краін). Асноўнымі гандлёвымі партнёрамі выступаюць Узбекістан, Іран, Украіна і Турцыя.
Работа завода і непасрэдна рэалізацыя інвестпраекта абмяркоўваліся ў снежні 2019 года на нарадзе ў Прэзідэнта. Тады прэм'ер-міністр Сяргей Румас адзначыў наяўнасць складанасцей па шэрагу праектаў, што патрабавала прыняцця рашэнняў на ўзроўні кіраўніка дзяржавы. У ліку такіх праектаў выраб паперы-асновы на прадпрыемстве ў Шклове. Яно не выйшла на кантрактныя параметры вытворчасці. У цяперашні час лінія выпускае альтэрнатыўныя віды прадукцыі. Аднак гэта менш прыбыткова ў параўнанні з вытворчасцю паперы-асновы.
Для забеспячэння магчымасці выпуску паперы-асновы неабходнай якасці патрабуецца дапрацоўка асобных вузлоў і агрэгатаў. Прадпрыемства запытала для завяршэння рэалізацыі праекта дадатковыя бюджэтныя сродкі.
Па рашэнні кіраўніка дзяржавы працу адпаведных прадпрыемстваў з праблемнымі інвестпраектамі было вырашана падвергнуць рэвізіі – пачынаючы ад пытанняў навядзення парадку, выканальніцкай дысцыпліны, гаспадарчай дзейнасці і заканчваючы фінансавымі вынікамі, наяўнасцю бізнес-стратэгіі, пытаннямі павышэння якасці прадукцыі, канкурэнтаздольнасці, імпартазамяшчэння. Прэзідэнт тады заявіў аб намеры асабіста наведаць і праінспектаваць некаторыя прадпрыемствы ў пачатку наступнага года. Тэхналогіі, аб'ёмы, прыбытак, рэнтабельнасць – па гэтых крытэрыях у першую чаргу будзе ацэньвацца эфектыўнасць іх працы. Гаворка пра тое, каб прадпрыемствы задзейнічалі ўсе магчымыя рэсурсы для самастойнага вырашэння праблем, што назапасіліся, і толькі пасля гэтага звярталіся па дапамогу да дзяржавы.