Прэзідэнт Беларусі Аляксандр Лукашэнка на нарадзе па пытаннях развіцця беларускай прамысловасці запатрабаваў забяспечыць абарону ўнутранага рынку, перадае карэспандэнт БЕЛТА.
Кіраўнік дзяржавы падвергнуў крытыцы ўрад і ў першую чаргу профільнага віцэ-прэм'ера за непрыгожую працу на ўнутраным рынку, падкрэсліўшы, што трэба забяспечыць разумную абарону гэтага рынку. "Мы павінны абараняць разумна ўласны рынак", - сказаў Прэзідэнт.
Пры гэтым абсалютную абарону ўнутранага рынку ад імпарту Аляксандр Лукашэнка не лічыць магчымым варыянтам, паколькі ў адказ іншыя краіны закрыюць свае рынкі для айчыннай прадукцыі. "Такая наша доля, што ў нас вырабляецца ўсё тое, што ў свеце вырабляюць у вялікай колькасці. Таму проста так абараняць свой рынак, закрыцца на мяжы і нікога не пусціць не атрымаецца. Трэба дзейнічаць разумна. Для гэтага ў нас ёсць урад, каб дапамагаў прамысловым прадпрыемствам працаваць", - адзначыў Прэзідэнт.
Кіраўнік дзяржавы арыентаваў на тое, каб больш актыўна адстойваць інтарэсы Беларусі ў рамках тых дамоўленасцей, якія маюцца з іншымі краінамі, у тым ліку з Расіяй. "Мы часам гэта пускаем на самацёк", - заўважыў Аляксандр Лукашэнка.
Прэзідэнт звярнуў увагу, што цяпер Беларусь губляе расійскі рынак па некаторых традыцыйных беларускіх таварах - трактарах, халадзільніках. Хоць у частцы продажаў халадзільнікаў сітуацыя пачынае выпраўляцца і намяціліся станоўчыя тэндэнцыі. "Трэба гэтым карыстацца", - арыентаваў беларускі лідар.
"Нягледзячы на вытворчасць шырокай лінейкі айчыннай тэхнікі, мы шмат у чым цяпер закупляем імпартнае (аналагі. - Заўвага. БЕЛТА), прычым там, дзе не павінны закупляць", - абазначыў яшчэ адзін праблемны аспект Прэзідэнт. У сувязі з гэтым ён пацікавіўся ў адказных асоб, чаму так адбываецца, ці саступаюць айчынныя тавары па цане ці не дацягваюць па якасці. Ці прычына ў тым, што не выбудавана эфектыўная маркетынгавая палітыка.
Кіраўнік дзяржавы ўдакладніў, якія канкрэтныя меры прыняты па абароне ўнутранага рынку, што зроблена і, галоўнае, калі будзе вынік. "А вынік у тым, каб прадпрыемствы рэнтабельна працавалі і былі грошы", - адзначыў Прэзідэнт.