Прэзідэнт Беларусі Аляксандр Лукашэнка павіншаваў работнікаў і ветэранаў органаў і падраздзяленняў па надзвычайных сітуацыях з прафесійным святам – з Днём выратавальніка. Аб гэтым БЕЛТА паведамілі ў прэс-службе беларускага лідара.
"Сёння мы аддаём даніну павагі людзям, якія ўступаюць у барацьбу са стыхіямі і любымі надзвычайнымі сітуацыямі, праяўляючы самаахвярнасць і рашучасць. Ваша смеласць і гатоўнасць прыйсці на дапамогу заслужылі найглыбейшую павагу і прызнанне ў грамадстве, – гаворыцца ў віншаванні. – Штодня рызыкуючы сабой, захоўваючы жыццё і здароўе людзей, а таксама маёмасць, беларускія выратавальнікі з'яўляюцца сапраўдным прыкладам служэння Айчыне. У экстрэмальных умовах вы дзейнічаеце прафесійна і ўпэўнена, праяўляючы адвагу і гонар".
Словы шчырай удзячнасці Аляксандр Лукашэнка адрасаваў ветэранам органаў і падраздзяленняў па надзвычайных сітуацыях, дзякуючы якім закладзены падмурак цяперашніх поспехаў ведамства. "Асаблівая ўдзячнасць за навучанне насельніцтва правілам паводзін і бяспекі, выхаванне новых пакаленняў выратавальнікаў і патрыётаў", – адзначыў кіраўнік дзяржавы.
Ён падзякаваў усім за стойкасць, цярпенне, адданасць справе і жаданне дапамагаць кожнаму, хто апынуўся ў бядзе. "Няхай вашы намаганні будуць ацэнены па вартасці, а штодзённая карпатлівая праца прыносіць новыя поспехі і магчымасці для развіцця. Жадаю моцнага здароўя, шчасця, міру і дабра вам і вашым блізкім", – пажадаў Аляксандр Лукашэнка.