Прэзідэнт Беларусі Аляксандр Лукашэнка заявіў аб неабходнасці нарошчваць тавараабарот з Кыргызстанам на сустрэчы з паслом гэтай краіны ў Беларусі Е. Ібраімавым, перадае карэспандэнт БЕЛТА.
"Што тычыцца нашых адносін, вядома, недзе там у нас пад $170 млн тавараабарот за апошні год, але гэта паміж краінамі нішто. Мы з губернямі Расіі многімі маем такі тавараабарот і значна вышэй. Таму з Кыргызстанам нам трэба павялічваць тавараабарот", - сказаў беларускі лідар.
Сустрэча з паслом Кыргызстана адбылася ў сувязі з завяршэннем яго дыпламатычнай місіі ў Беларусі, таму Аляксандр Лукашэнка адрасаваў яму асобную просьбу - не забываць аб Беларусі і на новым пасадзе садзейнічаць далейшаму развіццю супрацоўніцтва. "Калі вы будзеце служыць далей у Міністэрстве замежных спраў Кыргызстана або дзесьці будзеце працаваць, вы памятайце аб гэтым. Падкажыце, парайце", - сказаў кіраўнік дзяржавы.
Аляксандр Лукашэнка
"Вельмі спадзяюся, што чатыры з паловай гады, якія вы працавалі ў Беларусі, будуць добрай прыступкай у вашай кар'еры. У жыцці ў вас гэты час застанецца назаўжды, гэта натуральна. Галоўнае, каб у вас былі добрыя ўспаміны аб нашай Беларусі. Мы людзі добразычлівыя. Такія, як кыргызы, дарэчы, гасцінныя. Таму вы будзеце добрым словам успамінаць праведзеныя ў Беларусі гады вашай дыпламатычнай службы. Мы вельмі спадзяемся, што дзе б вы ні працавалі ў будучыні, вы будзеце па-сапраўднаму нашым чалавекам, беларускім - будзеце прасоўваць інтарэсы Беларусі абавязкова ў інтарэсах Кыргызстана", - выказаў пажаданне Аляксандр Лукашэнка.
Кіраўнік дзяржавы падкрэсліў, што пастаўкі неабходнай тэхнікі і абсталявання, сумесную вытворчасць у Кыргызстане могуць быць значна шырэйшымі па наменклатуры, чым цяпер. У цяперашні час там рэалізуюцца кааперацыйныя праекты па сумеснай вытворчасці ліфтавага абсталявання і трансфарматараў.
"Можам усё вырабляць у вас і навучаць тэхналогіям вашых людзей. Тэхналогіям, якіх вы не мелі раней. Па гэтых жа трансфарматарах, ліфтах, трактарах, аўтамабілях і гэтак далей. Вы ведаеце, што мы можам вырабіць. І для Кыргызстана ўзровень тэхналагічнай аснашчанасці краіны, як Беларусь, - гэта дастаткова высокі ўзровень. Мы гатовыя дзяліцца гэтымі тэхналогіямі", - заявіў Прэзідэнт.