Прэзідэнт Беларусі Аляксандр Лукашэнка 6 лютага правёў нараду па пытаннях удасканалення прававога рэгулявання статусу старшыні выканкама базавога ўзроўню, перадае карэспандэнт БЕЛТА.
"Сёння мы павінны канчаткова абмеркаваць усе пытанні, якія тычацца павышэння ролі раённых і гарадскіх выканкамаў, так званага базавага ўзроўню, і іх старшынь", - адзначыў Аляксандр Лукашэнка, адкрываючы нараду.
Кіраўнік дзяржавы нагадаў, што на пасяджэнні Прэзідыума Усебеларускага народнага сходу ў лістападзе 2024 года быў разгледжаны адпаведны праект Указа. Тады прагучала шмат прапаноў, у тым ліку аб тым, каб не прымаць Указ Прэзідэнта, а прыняць закон.
"Заканапраект падрыхтаваны, прадстаўлены мне для ўнясення ў Палату прадстаўнікоў. Давайце яшчэ раз паглядзім, ці ўсе надзённыя пытанні ў ім адлюстраваны, ці ўстранены праблемы, якія сёння перашкаджаюць эфектыўнаму функцыянаванню старшынь рай-, гарвыканкамаў, - сказаў беларускі лідар. - Пры гэтым хачу папярэдзіць усіх, што тут не трэба трымацца за нейкія паўнамоцтвы і свой статус наверх, каб не аддаць нейкія паўнамоцтвы туды, уніз. Гэта абсалютна непрымальна. Мы павінны зыходзіць з пазіцый інтарэсаў нашай дзяржавы".
Аляксандр Лукашэнка падкрэсліў, што пры абмеркаванні праекта дакумента трэба канчаткова вызначыцца з яго формай і зместам, каб старшыні былі яшчэ больш матываваныя на вынік і эфектыўна працавалі. Кіраўнік дзяржавы пацікавіўся, якімі кадравымі, эканамічнымі і іншымі паўнамоцтвамі прапануецца надзяліць мясцовую ўладу, каб даць магчымасць вырашаць надзённыя пытанні і гуляць больш прыкметную ролю ў развіцці свайго рэгіёна, ці патрэбен для гэтага праект закона, ці больш эфектыўна будзе ўсё ж такі працаваць прэзідэнцкі Указ.
"Галоўнае - прынцыпова прыняць актуальныя, запатрабаваныя рашэнні. Ролю гэтага асноўнага звяна, якое ў працы сутыкаецца непасрэдна з людзьмі, нам трэба павышаць. Можа быць, і хапае паўнамоцтваў. Тады скажыце. У якім ключы будзем дзейнічаць, я сказаў. Не трэба баяцца надзяляць старшынь гар-, райвыканкамаў адпаведнымі функцыямі і паўнамоцтвамі. Спытаюць з іх сур'ёзна, ціск на іх будзе вельмі сур'ёзны, але мы павінны даць ім рычагі", - рэзюмаваў Прэзідэнт.