Прэзідэнт Беларусі Аляксандр Лукашэнка 16 жніўня прыняў са справаздачай старшыню Савета Рэспублікі Нацыянальнага сходу Наталлю Качанаву, перадае карэспандэнт БЕЛТА.
Прэзідэнт вызначыў тры групы пытанняў. Яны датычацца сітуацыі ў сталіцы, бо Наталля Качанава таксама з'яўляецца ўпаўнаважаным кіраўніка дзяржавы па горадзе Мінску. Другая група пытанняў датычыцца таго, як у Савеце Рэспублікі пачала працу новая каманда. Трэцяя – міжнародныя кантакты па лініі Савета Рэспублікі.
"Наталля Іванаўна, перш за ўсё – Мінск. Вы, як упаўнаважаны чалавек па Мінску, сітуацыю мне дакладзіце. Асабліва па тых пытаннях, па якіх мы з вамі вызначаліся. І асабліва па эканамічных – прадпрыемствы. Матавелазавод – як там сітуацыя? Па продажы асобных будынкаў, памяшканняў... Разумееце, пра што ідзе размова. Ну і як пачала працаваць новая каманда верхняй палаты парламента? Міжнародныя вашы кантакты і іншыя пытанні, якія вы лічыце патрэбным абмеркаваць", – сказаў беларускі лідар.
Наталля Качанава ў сваю чаргу адзначыла, што Савет Рэспублікі ў новым складзе правёў ужо чатыры пасяджэнні. "Прыняты 31 законапраект. Мы актыўна працуем цяпер, у міжсесійны перыяд. Уключыліся ў працу дастаткова актыўна, працуем з людзьмі. Разглядаем тыя законапраекты, якія дадзены нам на экспертным савеце. Праца вядзецца актыўна па ўсіх напрамках", – сказала яна.
Крыніца: belta.by