Прэзідэнт Беларусі Аляксандр Лукашэнка заклікаў да пільнасці на фоне мілітарысцкай абстаноўкі ў суседніх краінах. Адпаведную заяву ён зрабіў пры зацвярджэнні рашэнняў на ахову дзяржаўнай мяжы ў 2024 годзе, перадае карэспандэнт БЕЛТА.
Кіраўнік дзяржавы адзначыў, што гэта мерапрыемства традыцыйнае, з году ў год паўтараецца, але вельмі важнае з-за той абстаноўкі, якая разгортваецца вакол Беларусі. "Сённяшняе рашэнне на ахову дзяржаўнай мяжы мае сваю асаблівасць у тым, што ў нас асаблівая сітуацыя: на поўдні - вайна, на захадзе - Польшча, Літва, балтыйскія дзяржавы - і таго горш. Падкрэсліваю: і таго горш. Там рыхтуюцца адпаведныя атрады, палкаводцы вызначаны", - сказаў Прэзідэнт.
Аляксандр Лукашэнка падкрэсліў, што ў Беларусі ведаюць і "байцоў гэтых атрадаў", якія гатовыя ўжо ваяваць супраць уласнай краіны.
"Таму, як я заўсёды вайскоўцам кажу і асабліва міністру абароны, мы не павінны нічога празеваць, па-народнаму кажучы. Ні ў якім разе нельга дапусціць нейкіх выпадковых развіццяў падзей на нашай мяжы. Таму - пільнасць і яшчэ раз пільнасць", - звярнуў увагу Прэзідэнт.
На мерапрыемстве прысутнічалі дзяржаўны сакратар Савета бяспекі Аляксандр Вальфовіч, міністр абароны Віктар Хрэнін, старшыня Дзяржаўнага пагранічнага камітэта Канстанцін Маластаў і начальнік Генеральнага штаба Узброеных Сіл - першы намеснік міністра абароны Віктар Гулевіч.
Аляксандр Лукашэнка адзначыў, што пакуль адказныя асобы "нядрэнна выконваюць свае функцыі".
Кіраўнік дзяржавы заслухаў кіраўніка ДПК і начальніка Генштаба. Асобна Прэзідэнт пацікавіўся абстаноўкай на наземнай мяжы (памежнікі яе называюць "зялёнай мяжой", хоць цяпер яе можна назваць "белай", бо ўсё пакрыта снегам) і ў паветранай прасторы. "Гэта таксама мяжа. У савецкія часы наша адказнасць была - лінія мяжы і паветраная прастора ў тым ліку", - заўважыў Аляксандр Лукашэнка.
"Мы ўзмацнілі дзяржаўную мяжу арміяй. Якая функцыя, роля арміі? Як мы яе там выконваем, аказваем падтрымку і садзейнічанне пагранічным войскам?" - задаў яшчэ шэраг пытанняў прысутным кіраўнік дзяржавы.
Прэзідэнту далажылі аб актуальнай абстаноўцы на дзяржаўнай мяжы, сілах і сродках, якія задзейнічаны ў забеспячэнні пагранічнай бяспекі з беларускага боку, а таксама аб кантынгенце ў суседніх краінах.