Забеспячэнне міру і стабільнасці, росту эканомікі і годнага ўзроўню жыцця людзей па-ранейшаму з'яўляюцца прыярытэтнымі задачамі. Гэта адзначыў Аляксандр Лукашэнка 30 снежня пры прадстаўленні на пасаду кіраўніка Адміністрацыі Прэзідэнта Беларусі Аляксандра Касінца, паведамілі БЕЛТА ў прэс-службе беларускага лідара.
Забеспячэнне міру і стабільнасці, росту эканомікі і годнага ўзроўню жыцця людзей па-ранейшаму з'яўляюцца прыярытэтнымі задачамі. Гэта адзначыў Аляксандр Лукашэнка 30 снежня пры прадстаўленні на пасаду кіраўніка Адміністрацыі Прэзідэнта Беларусі Аляксандра Касінца, паведамілі БЕЛТА ў прэс-службе беларускага лідара.
У любой дзяржаве змена кіраўніцкіх кадраў - натуральны працэс. У жыцці нішто не стаіць на месцы, і кадравыя рашэнні заўсёды павінны адпавядаць той абстаноўцы, якая склалася на дадзены момант, лічыць Прэзідэнт Беларусі.
"Тры дні таму мною быў прыняты шэраг кадравых рашэнняў, якія закранулі ўрад і Адміністрацыю Прэзідэнта. Сутнасць гэтых рашэнняў вам вядомая. Пасада кіраўніка Адміністрацыі Прэзідэнта - адна з ключавых у нашай сістэме кіравання. Не раз мы гаварылі: Адміністрацыя Прэзідэнта - гэта штаб кіраўніка дзяржавы. І ад таго, хто ўзначаліць гэты штаб, залежыць многае", - падкрэсліў Аляксандр Лукашэнка. Ён ахарактарызаваў Аляксандра Касінца як досведнага і валявога кіраўніка, за плячыма якога багаты вопыт кіраўніцкай працы. У свой час Аляксандр Касінец быў рэктарам аднаго з вядучых ВНУ, а таксама віцэ-прэм'ерам, курыраваў найважнейшыя сферы сацыяльнай палітыкі, аховы здароўя, культуры. Шмат гадоў кіраваў Віцебскай вобласцю.
Прэзідэнт Беларусі лічыць, што ініцыятыўнасць, энергічнасць, рашучасць, дзелавая хватка Аляксандра Касінца - гэта тыя якасці, якія дазволяць яму паспяхова справіцца з новымі высокімі абавязкамі. І ён надасць працы Адміністрацыі Прэзідэнта новую магутную энергетыку.
У калектыў Адміністрацыі Прэзідэнта ўліваюцца і два новыя намеснікі - Мікалай Снопкоў і Ігар Бузоўскі. У свой час абодва яны працавалі ў Адміністрацыі Прэзідэнта. У абодвух за плячыма сур'ёзны вопыт кіраўніцкай працы. Мікалай Снопкоў быў міністрам эканомікі, Ігар Бузоўскі ўзначальваў найбуйнейшую моладзевую арганізацыю. Кіраўнік дзяржавы выказаў упэўненасць, што яны годна справяцца з даручанымі ім новымі ўчасткамі працы.
Прэзідэнт падкрэсліў: "Будучы год – экзамен для ўсёй улады, і народ дасць ацэнку нашай агульнай працы". "Ніякіх надзвычайных задач у нас няма. Задачы ранейшыя – зберагчы мір і парадак у краіне, забяспечыць рост эканомікі і годны ўзровень жыцця людзей", – адзначыў Аляксандр Лукашэнка. Пры гэтым ён сказаў, што не бачыць прычын для росту цэн у краіне, паколькі сабекошт прадукцыі не павялічыўся, не выраслі ў цане складнікі сабекошту, гэта рэсурсы і сыравіна.
Кіраўнік дзяржавы падкрэсліў, што праца з кадрамі – ключавая задача Адміністрацыі Прэзідэнта. "Мае патрабаванні вядомыя: прафесіяналізм, поўная самаадданасць у працы і, галоўнае, вынік. Яшчэ дадаў бы – самаадданае служэнне людзям", – сказаў Прэзідэнт. Ён таксама падкрэсліў, што для чыноўнікаў, дзяржслужачых зусім непрымальная такая якасць, як пыха. Кіраўнік дзяржавы лічыць, што ў працы з кадрамі яшчэ шмат праблем. У прыватнасці, на яго думку, павольна абнаўляецца кіраўніцкі апарат. На месцах эфектыўнасць выкарыстання рэзерваў кадраў надзвычай нізкая. На сённяшні дзень у рэспубліканскіх і мясцовых органах улады шмат вакансій кіраўнікоў.
Аляксандр Лукашэнка падкрэсліў, што з маладымі кіраўнікамі вертыкалі ніхто сур'ёзна не працуе, забытая практыка настаўніцтва. "На дзяржаўную службу часта трапляюць людзі з абмежаваным мысленнем, якія баяцца ці не хочуць праяўляць ініцыятыву, самастойна прымаць рашэнні і несці адказнасць за вынік, – адзначыў Прэзідэнт. – Забюракратызаванасць і закасцянеласць дзяржапарату тармазяць развіццё краіны".
Кіраўнік дзяржавы адзначыў, што яго галоўныя патрабаванні да кадраў застаюцца нязменнымі. Паводле яго слоў, новыя прызначэнні далі старт працэсу амаладжэння кадраў. "І такі курс будзе працягнуты ва ўсіх сферах нашага жыцця, – заявіў Прэзідэнт. – Гэта павінна стаць вашай паўсядзённай задачай – мець рэзерв кадраў, каб з яго вырасціць маладых кіраўнікоў, здольных знаходзіць хуткае рашэнне ў любой нестандартнай сітуацыі. Інакш мы безнадзейна адстанем ад свету, які імкліва змяняецца вакол нас".
На думку Аляксандра Лукашэнкі, трэба будзе сур'ёзна папрацаваць з банкам даных адоранай моладзі. "Гэта галоўнае багацце, з якім мы павінны працаваць. Так, не ўсе з іх, але многія стануць кіраўнікамі. Трэба толькі выпрацаваць сістэму", – лічыць кіраўнік дзяржавы.
Аляксандр Лукашэнка перакананы, што "не можа быць добрым міністрам чалавек, які не бачыў станка ў працоўным цэху ці зямлі на сельгаспрадпрыемстве. Не можа быць добрым міністр адукацыі, які не ведае, што такое школа, ВНУ. Не можа быць добрым кіраўніком чалавек, які не ведае жыцця".
Кіраўнік дзяржавы адзначыў, што найважнейшым пытаннем з'яўляецца павышэнне адказнасці кадраў. "Чым хутчэй змяняецца абстаноўка вакол нашай дзяржавы, чым вастрэй яна становіцца, тым больш жорсткім будзе попыт з кіраўніцкіх кадраў", - заявіў Прэзідэнт Беларусі.
Доказам гэтаму служыць прыняты дэкрэт аб узмацненні патрабаванняў да кіраўніцкіх кадраў і работнікаў арганізацый. "Калі нехта ўчора скардзіўся на недахоп паўнамоцтваў, сёння - калі ласка, працуйце, - сказаў Аляксандр Лукашэнка. - Але нароўні з атрыманымі правамі адказвайце за даручаную справу".
Па словах Прэзідэнта, так званы праславуты чалавечы фактар становіцца вызначальным на кожным працоўным месцы - ад радавога рабочага і сельскага працаўніка да прэм'ер-міністра.
Кіраўнік дзяржавы заявіў аб важнасці аптымізацыі колькасці дзяржсакратарыята і функцый дзяржаўных органаў. "Нам трэба пазбавіцца ад залішняй колькасці ў дзяржсакратарыяце, падняўшы зарплату для астатніх, - лічыць Прэзідэнт. - Трэба адкінуць лішнія функцыі. Мы ж выдатна ведаем, што карысна, а што трэба выкараніць. Неабходна таксама павышаць выканальніцкую дысцыпліну".
Аляксандр Лукашэнка лічыць, што трэба правесці вялікую працу па дэбюракратызацыі механізмаў кіравання ва ўсіх сферах жыцця. "Вось ваша разам з урадам найбліжэйшая прыярытэтная задача. Ва ўсіх дзяржорганаў ёсць рэзервы для ўдасканалення працы", - заявіў кіраўнік дзяржавы.
Акрамя таго, Аляксандр Лукашэнка даручыў стварыць сістэму эфектыўнага адбору слухачоў Акадэміі кіравання пры Прэзідэнце Беларусі і маніторынгу іх кар'ернага росту. А таксама перагледзець падыходы да навучання рэзерву кадраў зыходзячы з рэалій эканомікі і грамадскага жыцця.
"Мы павінны выбудаваць новую сістэму адбору сапраўдных прафесіяналаў, а таксама навучання моладзі. Тут сваю ролю павінна адыграць Акадэмія кіравання пры Прэзідэнце Рэспублікі Беларусь", - падкрэсліў кіраўнік дзяржавы. Пакуль што ў працы гэтага ВНУ ёсць нямала недахопаў, сказаў Аляксандр Лукашэнка. У прыватнасці, да гэтага часу Акадэміі кіравання не ўдалося стаць сапраўднай кузніцай кіраўніцкіх кадраў. Аляксандр Лукашэнка выказаў надзею, што ў будучым годзе гэтая праблема будзе вырашана.
Кіраўнік дзяржавы падкрэсліў, што эканоміка была, ёсць і застаецца ключавым прыярытэтам. "Вырашым эканамічныя праблемы - ніякія бяды нам не страшныя", - заявіў Прэзідэнт.
Ён таксама адзначыў: "З усімі ўнутранымі і знешнімі пагрозамі мы справімся. Ніякай пятай калоне расхістаць краіну не дамо. Але калі дапусцім правал у эканоміцы, то можам страціць усё - і давер людзей, і стабільнасць у краіне, ды і саму краіну".
Аляксандр Лукашэнка падкрэсліў, што, безумоўна, галоўным эканамічным штабам краіны з'яўляецца ўрад. Яму разам з Нацбанкам дадзены ўсе неабходныя паўнамоцтвы і рычагі кіравання. "Аднак побач з урадам павінны працаваць і ўсе іншыя органы ўлады - мясцовыя, рэгіянальныя, і Адміністрацыя Прэзідэнта, і Камітэт дзяржкантролю, - сказаў кіраўнік дзяржавы. - Замінаць працы адзін аднаму не трэба, але і дзяліць праблемы на свае і чужыя таксама нельга. Праблема ў нас агульная - не дапусціць эканамічных узрушэнняў, абараніць нашых людзей і выйсці на станоўчы рост у наступаючым годзе".
Аляксандр Лукашэнка запатрабаваў ад Адміністрацыі Прэзідэнта трымаць на строгім кантролі дакладнае выкананне ўсіх прынятых рашэнняў у эканамічнай сферы, усіх даручэнняў Прэзідэнта.
Акрамя таго, кіраўнік дзяржавы адзначыў выключную важнасць працы сацыяльнага блока ўрада і падкрэсліў, што Адміністрацыя Прэзідэнта павінна трымаць і гэтыя пытанні пастаянна ў полі зроку, тым больш што там назапасілася нямала праблем.
Аляксандр Лукашэнка запатрабаваў выбудоўваць сістэму ідэалагічнай работы ў адпаведнасці з патрабаваннямі часу.
"У ідэалагічнай рабоце важны непасрэдны кантакт з людзьмі", - перакананы кіраўнік дзяржавы. Ён лічыць, што трэба прадумаць, як пісьменна арганізаваць інфармацыйную работу.
Аляксандр Лукашэнка таксама адзначыў, што неабходна нанова прааналізаваць работу вядучых СМІ. "Ад іх патрабуецца максімум творчасці, і пры гэтым трэба засяродзіцца на галоўным - на сур'ёзных, пераканаўчых, даходлівых інфармацыйных, аналітычных перадачах. Тэлебачанне павінна не толькі забаўляць і весяліць, але і тлумачыць, і, калі хочаце, выхоўваць", - лічыць Прэзідэнт.
Па яго словах, інфармацыйная сітуацыя вакол Беларусі заўсёды была няпростай. Але да гэтага часу ўсе спробы выкарыстоўваць супраць нас вытанчаныя інфармацыйныя тэхналогіі былі няўдалыя.
Працягваючы тэму ідэалагічнай работы, Аляксандр Лукашэнка сказаў: "Кожны кіраўнік - і вобласці, і горада, і раёна, і асобнага прадпрыемства - павінен памятаць: менавіта ён з'яўляецца галоўным ідэолагам на даручанай яму тэрыторыі або арганізацыі. Забываць аб ідэалагічнай рабоце за бягучымі вытворчымі праблемамі нельга нікому. Поспехі на прадпрыемстве павінны быць асновай для ідэалагічнай работы".
Прэзідэнт таксама сказаў, што ідэалагічныя пытанні павінны быць пад пастаянным кантролем Адміністрацыі кіраўніка дзяржавы.
Ён адзначыў, што ў полі зроку Адміністрацыі Прэзідэнта павінны знаходзіцца пытанні не толькі ўнутранай, але і знешняй палітыкі. "Геапалітычная абстаноўка і ў свеце, і вакол нашай краіны становіцца ўсё больш складанай", - падкрэсліў Прэзідэнт. Паводле яго слоў, задачу па выпрацоўцы і рэалізацыі апераджальных дзеянняў у адказ на знешнія пагрозы трэба вырашаць ва ўзаемадзеянні з урадам і МЗС.
Наступны год стане ключавым для Беларусі па многіх напрамках. У прыватнасці, стане рэальнасцю ЕАЭС. Тут, па словах Прэзідэнта, нельга дапусціць страты ўласных інтарэсаў.
"Асобнае пытанне - адносіны з Захадам, - адзначыў Аляксандр Лукашэнка. - Так, ёсць станоўчыя моманты як у палітычнай, так і ў эканамічнай галіне. Давайце будзем працягваць работу ў гэтым напрамку. Але ні ў якім разе нельга дапусціць ціску на нас. Ні з Захаду, ні з Усходу ціск непрымальны, асабліва ў сувязі з маючымі адбыцца выбарамі". Беларусь праводзіць шматвектарную знешнюю палітыку, падкрэсліў Прэзідэнт.
Кажучы аб супрацоўніцтве з Захадам, Прэзідэнт таксама адзначыў: "Мы мяжуем з Захадам і не хочам ніякіх сутыкненняў - ні палітычных, ні дыпламатычных. Палова нашага гандлю там. Калі Захад працягне нам руку супрацоўніцтва, то трэба гэтым скарыстацца. Мы будзем імкнуцца да нармалізацыі адносін з Захадам. Калі яны хочуць з намі на роўных супрацоўнічаць і даюць сігналы да гэтага, мы прымем гэты сігнал. Мы заўсёды гаварылі аб гэтым - давайце сядаць за стол перамоваў і дамаўляцца".
Закранаючы адносіны з Расіяй, Аляксандр Лукашэнка сказаў: "Нам сёння гэту краіну ніхто ў свеце не заменіць. Беларусь не будзе дзейнічаць на шкоду братняй Расіі".
"Адной з найважнейшых задач Адміністрацыі Прэзідэнта з'яўляецца каардынацыя дзяржаўнай палітыкі ў сферы права. Дадзенай функцыі Адміністрацыі неабходна надаваць пільную ўвагу і дзейнічаць больш рашуча, не абапіраючыся толькі на падыходы, прапанаваныя іншымі органамі", - сказаў Прэзідэнт. Па яго словах, у 2014 годзе быў шэраг нарматворчых ініцыятыў урада, наступствы якіх не былі сістэмна пралічаны. Часам асобныя гарачыя галовы высоўвалі ідэі, якія выклікалі такі грамадскі рэзананс, што даводзілася ўмешвацца Прэзідэнту. Аляксандр Лукашэнка адзначыў, што ў падобных сітуацыях Адміністрацыя Прэзідэнта не павінна быць назіральнікам або простым кантралёрам.
Па словах Аляксандра Лукашэнкі, у зоне ўвагі Адміністрацыі Прэзідэнта павінна знаходзіцца і стан нарматворчай дзейнасці Міністэрства юстыцыі, на аператыўнасць і якасць працы якога часам скардзяцца дзяржаўныя органы.
Важным складнікам дзейнасці Адміністрацыі Прэзідэнта ў сферы права з'яўляецца ўзгадненне законапраектаў, якія разглядаюцца парламентам.
Забеспячэнне паўнавартаснага ўзаемадзеяння кіраўніка дзяржавы з заканадаўчай і судовай уладай - яшчэ адна з асноўных задач Адміністрацыі Прэзідэнта. У Беларусі створаны ўсе ўмовы для функцыянавання парламента і судовай сістэмы. І тут трэба бачыць перспектывы, удасканальваць працу.
На думку Аляксандра Лукашэнкі, Адміністрацыя Прэзідэнта павінна трымаць руку на пульсе па сітуацыі ў рэгіёнах, дасканала ведаць праблемы мясцовых органаў улады і самакіравання. І тут важкае слова павінны сказаць памочнікі Прэзідэнта - галоўныя інспектары па рэгіёнах, у сферу дзейнасці якіх уваходзіць кадравая праца. "Але гэта не значыць, што памочнік павінен падмяняць губернатара, залішне ўмешвацца ў працу. Трэба выказаць сваю кропку гледжання, але рашэнне застаецца за губернатарам", - адзначыў кіраўнік дзяржавы.
Ён таксама падкрэсліў, што праца са зваротамі грамадзян і юрыдычных асоб з'яўляецца найважнейшым напрамкам дзейнасці Адміністрацыі Прэзідэнта.
"Я разумею, як загружана Адміністрацыя Прэзідэнта зваротамі. Але недапушчальна, калі часам гэтыя лісты вяртаюцца да таго, на каго скардзяцца грамадзяне або калектывы. У наступным годзе я знайду магчымасць камісійна праверыць, як выконваюцца мае ўказанні ў гэтым плане, - падкрэсліў кіраўнік дзяржавы. - Ёсць людзі, якія звяртаюцца да Прэзідэнта як у апошнюю інстанцыю. І трэба падумаць, як дапамагчы гэтым людзям", - сказаў беларускі лідар.
Кіраўнік дзяржавы заявіў, што сістэму работы са зваротамі грамадзян трэба ўдасканальваць і варта памятаць, што дэбюракратызацыя была і застаецца ключавым напрамкам палітыкі ў Беларусі і гэта - асабістая адказнасць кіраўніка Адміністрацыі Прэзідэнта.
Навіны Беларусі (БЕЛТА)