Прэзідэнт Беларусі Аляксандр Лукашэнка традыцыйна прымаў удзел у рэспубліканскім суботніку, які сёлета праводзіўся 17 красавіка, паведамляе БЕЛТА.
Прэзідэнт Беларусі Аляксандр Лукашэнка традыцыйна прымаў удзел ў рэспубліканскім суботніку, які сёлета праводзіўся 17 красавіка, паведамляе БЕЛТА.
Кіраўнік дзяржавы працаваў на сваёй малой радзіме - у аграгарадку Александрыя Шклоўскага раёна. Брыгада на суботніку на чале з Аляксандрам Лукашэнкам займалася добраўпарадкаваннем і азеляненнем тэрыторыі вакол пляцоўкі, дзе штогод на Купалле праводзіцца папулярны і ўпадабаны гасцям з розных краін фестываль "Александрыя збірае сяброў".
Выбар гэтага месца на беразе Дняпра асабліва сімвалічны ў Год народнага адзінства, бо яно заўсёды было месцам дружбы і супрацоўніцтва паміж прадстаўнікамі розных нацыянальнасцей і культур.
Тут, на гандлёвым шляху "з варагаў у грэкі", праходзілі кірмашы і народныя гулянні, фарміраваліся традыцыі добрасуседства, чаго цяпер часам востра не хапае ў адносінах паміж краінамі. Працягам гэтай слаўнай гісторыі стала правядзенне фестывалю - ля моста, які злучае не толькі два блізкія сэрцу Аляксандра Лукашэнкі населеныя пункты - Александрыю і Копысь, але таксама Магілёўскую і Віцебскую вобласці.
Цяпер гэты маляўнічы куток Беларусі ўпрыгожаць высаджаныя дубы, рабіны і хмызнякі. У будучыні яны стануць яскравым напамінам не толькі аб добрай традыцыі праводзіць суботнікі, але таксама аб працавітасці і міралюбнай палітыцы беларускага народа, сімвалам клопату аб экалогіі і прыгажосці роднага краю.
Па прыбыцці да месца правядзення суботніка Аляксандр Лукашэнка прайшоў інструктаж па тэхніцы бяспекі і распісаўся ў адпаведным часопісе.
Ён успомніў, як у гэтым месцы, дзе цяпер стаіць сучасны мост, у гады яго дзяцінства была пераправа праз Дняпро. На процілеглым беразе ракі – пасёлак гарадскога тыпу Копысь. Менавіта на яго прыкладзе ў свой час па даручэнні кіраўніка дзяржавы пачалася мадэрнізацыя падобных населеных пунктаў па ўсёй краіне. Без лішніх выдаткаў, па-гаспадарску. "Менавіта зыходзячы з тых грошай, якія сёння ёсць. Адсюль пачыналася мадэрнізацыя сельскай гаспадаркі і гарадскіх пасёлкаў", - сказаў Прэзідэнт.
Аляксандр Лукашэнка нагадаў, што стаіць задача ў падобных населеных пунктах за мінімальны кошт выдзяляць участкі для жадаючых пабудаваць сабе дом. "Так павінна быць усюды. Але паглядзім, ці так гэта", - заўважыў кіраўнік дзяржавы.
Прэзідэнт нязменна прымае актыўны ўдзел у рэспубліканскіх суботніках і заўсёды падкрэслівае важнасць захавання традыцыі правядзення падобных мерапрыемстваў. Як правіла, кіраўнік дзяржавы працуе на знакавых будаўнічых аб'ектах, добраўпарадкаванні тэрыторый і высадцы дрэў.
Напрыклад, за апошнія гады суботнікі з удзелам Прэзідэнта прайшлі на будаўніцтве новага будынка Дзяржаўнага музея гісторыі Вялікай Айчыннай вайны, культурна-спартыўнага комплексу "Чыжоўка-Арэна", аквапарку "Лебядзіны", новага радзільнага дома і дзіцячай паліклінікі ў Мінску, Цэнтра алімпійскай падрыхтоўкі па мастацкай гімнастыцы.
Падчас аднаго з рэспубліканскіх суботнікаў Аляксандр Лукашэнка таксама прымаў удзел у рэканструкцыі стадыёна "Дынама" ў Мінску.
У ліку аб'ектаў, дзе за апошняе дзесяцігоддзе на суботніках працавала брыгада на чале з Прэзідэнтам, і плошча Дзяржаўнага сцяга Рэспублікі Беларусь.
Аляксандр Лукашэнка таксама займаўся высадкай дрэў на тэрыторыі гісторыка-культурнага комплексу "Лінія Сталіна" і Нацыянальнага парку "Прыпяцкі", добраўпарадкаваў Трафімаву крыніцу на сваёй малой радзіме каля аграгарадка Александрыя.БЕЛТА