У развіцці Саюзнай дзяржавы Беларусі і Расіі трэба рухацца далей, ствараючы агульны рынак газу, усталёўваючы адзіныя правілы нафтавага рынку, забяспечваючы справядлівыя цэны для перапрацоўшчыкаў, роўныя ўмовы гаспадарання для суб'ектаў абедзвюх краін. Пра гэта Прэзідэнт Беларусі Аляксандр Лукашэнка заявіў у інтэрв'ю расійскаму часопісу "Разведчик", перадае карэспандэнт БЕЛТА.
Важнай тэмай інтэрв'ю стала развіццё Саюзнай дзяржавы. Прэзідэнта папрасілі ацаніць дасягнутыя за апошні час вынікі і перспектывы на будучыню.
"Азіраючыся на пройдзены шлях, з упэўненасцю магу сказаць: выбар на карысць саюза з Расіяй прадыктаваны самым жыццём. Гэты выбар выратаваў нашы краіны ад эканамічнай катастрофы і страты суверэнітэту", - падкрэсліў Аляксандр Лукашэнка. Асабліва востра, па яго словах, гэта праявілася пасля крызісу 1998 года, калі прадпрыемствы спыняліся, цэны раслі, людзі гублялі зберажэнні. Менавіта тады стала канчаткова ясна - альбо краіны разам знаходзяць рашэнне, альбо кожная будзе выжываць паасобку. "І мы знайшлі гэты шлях - праз рэальную эканамічную інтэграцыю, стварэнне супольных вытворчасцей, узгодненую сацыяльную палітыку", - канстатаваў Прэзідэнт.
Вядома, не ўсё атрымлівалася адразу, часам здавалася, што кампраміс немагчымы, але заўсёды было відавочна: цана пытання не ў кароткатэрміновай выгадзе, а ў гістарычным лёсе народаў.
"Мы прайшлі праз мноства выпрабаванняў: фінансавыя крызісы, глабальныя эканамічныя страсенні, шалёныя санкцыі Захаду. Разам мы вытрымалі сур'ёзную праверку на трываласць. Вытрымалі таму, што стварылі ўнікальны фармат інтэграцыі, які не мае аналагаў у свеце, - звярнуў увагу кіраўнік дзяржавы. - Пры гэтым кожная краіна захоўвае свой суверэнітэт, незалежнасць, тэрытарыяльную цэласнасць, дзяржаўны лад. Моцныя суверэнныя дзяржавы - моцны саюз. Вось формула поспеху любой інтэграцыі".
"Так, рэсурсы ў Беларусі і Расіі розныя. Але ў гэтым і сіла СД. Мы не дублюем адзін аднаго, а арганічна дапаўняем, закрываем прабелы і памнажаем перавагі", - дадаў ён.
Расія была і застаецца галоўным гандлёва-эканамічным партнёрам Беларусі. Па выніках 2024 года Беларусь увайшла ў чацвёрку краін свету па аб'ёме таваразвароту з Расіяй і працягвае лідзіраваць сярод краін СНД. Гандлёвы абарот паміж краінамі вырас у сем разоў, дасягнуўшы летась разам з паслугамі амаль $60 млрд.
Павышаная ўвага надаецца імпартазамяшчальным праектам. Так, напрыклад, з'явіўся кар'ерны самазвал БЕЛАЗ грузападымальнасцю 90 т з расійскім рухавіком Яраслаўскага маторнага завода магутнасцю 1050 л.с. (раней у дадзеным класе ўжываліся толькі імпартныя рухавікі).
Але галоўным дасягненнем Саюзнай дзяржавы Аляксандр Лукашэнка лічыць адчувальнае паляпшэнне якасці жыцця грамадзян Беларусі і Расіі. Яны карыстаюцца роўнымі правамі ў СД пры працаўладкаванні, сацыяльным забеспячэнні, медыцынскім абслугоўванні, адукацыі і ў пенсійных пытаннях. Уведзены льготныя тарыфы на мабільную сувязь, пашыраны выбарчыя правы, павялічана колькасць авіярэйсаў паміж рэгіёнамі.
Асновай далейшага развіцця саюзніцкіх адносін дзвюх краін з'яўляецца паглыбленне рэгіянальнай інтэграцыі, адзначыў Прэзідэнт. У гэтым аспекце ён згадаў штогадовы Форум рэгіёнаў Беларусі і Расіі.
"Узаемадзеянне ў навукова-тэхнічнай сферы прайшло сур'ёзную эвалюцыю ад падтрымкі асобных галін да стварэння прынцыпова новых напрамкаў. Асабліва ярка гэты прагрэс бачны ў касмічнай сферы. Толькі ўявіце: восем сумесных праграм, першая беларуская жанчына-касманаўт на арбіце, дзеючы сумесны спадарожнік дыстанцыйнага зандавання Зямлі і новы апарат з рэкордным дазволам у 35 см, дзе начынне наша, а платформа - расійская", - працягнуў кіраўнік дзяржавы.
Ідзе актыўная праца над стварэннем адзінай лічбавай прасторы, развіццём штучнага інтэлекту, укараненнем разумных тэхналогій. "Сапраўдным тэхналагічным прарывам і сімвалам дружбы брацкіх народаў стала Беларуская АЭС, - падкрэсліў Аляксандр Лукашэнка. - Гэта наш адказ палітычнаму ціску і пляцоўка для развіцця ўласных кампетэнцый у выкарыстанні мірнага атама".
"Аднак без пабудовы аб'яднаных рынкаў энергетычных рэсурсаў складана разлічваць на эфектыўны рух наперад. Падпісаны дагавор аб агульным рынку электраэнергіі – толькі пачатак. Нам трэба рухацца далей: ствараць агульны рынак газу, усталёўваць адзіныя правілы нафтавага рынку, забяспечваць справядлівыя цэны для перапрацоўшчыкаў, роўныя ўмовы гаспадарання для суб'ектаў абедзвюх краін, – перакананы беларускі лідар. – У гэтым і сутнасць нашай Саюзнай дзяржавы – не проста дапамагаць адзін аднаму, а ствараць агульныя правілы гульні, якія вядуць да фарміравання паўнавартаснай адзінай эканамічнай прасторы з захаваннем палітычнага суверэнітэту кожнай краіны. 25 гадоў таму мы заклалі для гэтага фундамент. Сёння будуем будынак, а заўтра ўзвядзем цэлы горад на аснове тэхналагічнага суверэнітэту нашых эканомік. У ім абавязкова знойдзецца месца для новых сумеснх праектаў, прарыўных тэхналогій і новых адкрыццяў".
Аляксандр Лукашэнка заўважыў, што з Прэзідэнтам Расіі Уладзімірам Пуціным яны часта кажуць: саюз Беларусі і Расіі правераны часам. "Але сёння я скажу больш – ён правераны самім жыццём. І пакуль мы захоўваем вернасць агульным ідэалам, пакуль мы разам будуем агульную будучыню, нас не зламаць нікому. У гэтым неўміручая сіла Саюзнай дзяржавы, залог нашай непераможнасці", – заявіў беларускі лідар.