МАРГ рэкамендуе спажыўцам не перадаваць свае мабільныя тэлефоны незнаёмым асобам

Сёння на рынку фінансавых паслуг шырока распаўсюджана практыка хуткага крэдытавання грамадзян

Сёння на рынку фінансавых паслуг шырока распаўсюджана практыка хуткага крэдытавання грамадзян. З'явіўся такі фінансавы інструмент і ў сферы паслуг мабільнай сувязі – абанентам, якія падключыліся да паслугі v-banking (v-кашалёк), аператар сувязі прапануе 100 рублёў у якасці беспрацэнтнага крэдыту.

Разам з тым спажыўцы, якія падключылі такую паслугу, апынуліся ў зоне ўвагі нядобрасумленных грамадзян, якія звяртаюцца з просьбай даць ім мабільны тэлефон для здзяйснення тэрміновага званка, бо іх тэлефон нібыта разрадзіўся. За кароткі прамежак часу пад выглядам здзяйснення званка махляры падключаюцца да паслугі v-banking (v-кашалёк) на тэлефоне спажыўца і пераводзяць з яго грошы, атрыманыя пры падключэнні дадзенай паслугі, на свой рахунак, а затым вяртаюць тэлефон нічога не падазравалага гаспадара.

МАРГ папярэджвае карыстальнікаў паслугі v-banking (v-кашалёк), а таксама ўсіх грамадзян, якія карыстаюцца паслугамі мабільнай сувязі, і рэкамендуе не перадаваць незнаёмым асобам свае мабільныя тэлефоны. Лепш прапанаваць звярнуўшамуся дапамогу і патэлефанаваць на названы ім нумар самастойна, не перадаючы яму свой мабільны тэлефон – асоба, якая сапраўды мае патрэбу ў тэрміновым званку, атрымае дапамогу, а ў махляра не будзе шанцаў скарыстацца грашыма ўладальніка тэлефона.