18 лістапада, Мінск /Вольга Беляўская - БЕЛТА/. У Беларусі будуць ужосточаны меры па абмежаванні вывазу паліва, паведаміў сёння на сустрэчы з працоўным калектывам ААТ "МАЗ" прэм'ер-міністр Беларусі Міхаіл Мясніковіч, перадае карэспандэнт БЕЛТА. "Як бы гэта было непапулярна, я падпісаў учора пастанову, каб не раз у пяць, а раз у восем дзён выязджаць за мяжу, за выключэннем тых, хто едзе ў камандзіроўку, выконвае свае функцыянальныя абавязкі або працуе па дагаворы найму", - растлумачыў Міхаіл Мясніковіч. Гэтыя меры неабходныя для абмежавання вывазу з краіны нафтапрадуктаў, падкрэсліў ён. Пастанова пакуль не выйшла, у цяперашні час адпрацоўваюцца механізмы для яе ўвядзення, удакладніў прэм'ер-міністр. Кіраўнік урада нагадаў, што з-за дыспарытэту цэн міжнародныя аўтаперавозчыкі актыўна пачалі вывозіць дызпаліва з Беларусі ў іншыя краіны для перапродажу. "Цана паліва ў нас адрозніваецца прыкладна на $1,5 за літр у параўнанні з Польшчай, Літвой, Латвіяй, - нагадаў ён. - Калі ёмістасць бака складае адну тону, а то і больш, перавозчык мае прыбытак каля $1,5 тыс.". З-за сітуацыі, якая склалася, рэзка ўзрасла рэалізацыя дызпаліва ў Беларусі. "У выніку нашы нафтаперапрацоўчыя заводы маюць адмоўны баланс з-за таго, што не могуць выручыць неабходную колькасць рублёў, каб іх канвертаваць і купіць новыя партыі нафты", - канстатаваў кіраўнік урада. Ён таксама адзначыў, што перапродажам паліва займаюцца і кіроўцы легкавых аўтамабіляў. "Многія ператварылі гэта ў выгадны бізнес, аднак ён прыносіць шкоду для эканомікі і яго трэба спыняць", - рэзюмаваў Міхаіл Мясніковіч.-0-

БЕЛТА