Дэлегацыя ад ДПУ «Бярэзінскі біясферны запаведнік» напачатку кастрычніка пабывала ў Францыі. Нагодай для службовай камандзіроўкі паслужыла дамова аб міжнародным супрацоўніцтве паміж біясфернымі рэзерватамі. Развіццё экалагічнай асветы – вось аб'яднальная мэта.
Дэлегацыя ад ДПУ «Бярэзінскі біясферны запаведнік» напачатку кастрычніка пабывала ў Францыі. Нагодай для службовай камандзіроўкі паслужыла дамова аб міжнародным супрацоўніцтве паміж біясфернымі рэзерватамі. Развіццё экалагічнай асветы – вось аб'яднальная мэта.
На практычных семінарах чатыры нашыя прадстаўнікі даведаліся шмат цікавага ад замежных калег з Кампіноскага нацыянальнага парку Польшчы і прадстаўнікоў прымаючага боку з Біясфернага рэзервата «Паўночныя Вогезы».
Адукацыйны цэнтр у Кампіноскім парку адкрыўся ў 1997 годзе. А наогул ідэя экалагічнай адукацыі належыць англічанам і адносіцца да іх рэформы 1988 года, якая абазначыла задачы для школ. Урад Вялікабрытаніі вызначыў экалагічную адукацыю як "сэрца" палітыкі. Таму вывучэнне прыроднага асяроддзя ў школе гэтай краіны – абавязковае, а колькі адводзіць на падобныя заняткі навучальнага часу – кожная ўстанова вызначае самастойна. Не варта блытаць экалагічную асвету з урокамі біялогіі. Экскурсавод Алена Вашкевіч у гульнявой форме знаёміць дзяцей з жывёльным і раслінным светам. Спецыяльныя «размаўляючыя» стэнды дапамагаюць не толькі ўбачыць, да прыкладу, як выглядае тая ці іншая птушка, але і пачуць яе. Прышчэпліванне, такім чынам, любові да прыроды, дапаможа ў далейшым яе захаваць, бо ад беражлівых адносін кожнага, нават самага маленькага грамадзяніна, залежыць цэласнасць экасістэмы.
У Францыі знаходзіцца штаб-кватэра ЮНЕСКА і вялікая ўвага надаецца пытанням захавання прыроды. У спіс сусветных запаведнікаў біясферы ЮНЕСКА ўваходзяць два прыродныя паркі «Паўночныя Вогезы».
Беларускую дэлегацыю размясцілі ў экалагічным цэнтры пад назвай «Дом ля вады» ў перадгор'і. Падобных цэнтраў на тэрыторыі Вогезскіх паркаў шмат. Паркі назваў не маюць і адрозніваюцца толькі па месцазнаходжанні, а вось цэнтры азагалоўлены і кожны ў адпаведнасці са сваім напрамкам – «Дом бабра», «Дом зялёнага дзятла». Гэтыя дамы абсталяваны спецыяльнымі рэзервуарамі для збору вільгаці, якая затым праходзіць ачышчэнне праз спецыяльныя фільтры і падаецца ў душ, туалет, то бок, ніякіх падводных камунікацый няма. Наогул месца, дзе праходзіў практычны семінар па абмене вопытам, незвычайнае – горны хрыбет Вогезы знаходзіцца на паўночным усходзе Францыі і цягнецца на працягу 830 км пры шырыні 40-60 км. Самая высокая Гран-Бальён – 1424 метры.
Заняткі ў цэнтрах інтэрактыўныя, а не лекцыйныя – навучальная зала абсталявана высуўнымі стэндамі, аб'ёмныя дэталі можна пакратаць. Для навучання масавага і ў нязмушанай абстаноўцы - маюцца мяккія вялікія падушкі-сядалкі, раскіданыя прама на падлозе. На тэрыторыі паркаў мноства замкаў, нават адміністрацыя «Паўночнай Вогезы» знаходзіцца ў адным з іх. Гэта ўнікальныя помнікі архітэктуры, якія французы беражліва ахоўваюць.
У штаце супрацоўнікаў ёсць архітэктар, які дапамагае захаваць першапачатковы выгляд не толькі славутасцяў, але і дамоў мясцовых жыхароў – на тэрыторыі паркаў больш за трыццаць населеных пунктаў.
Знаходзячыся ў двух гадзінах язды ад Страсбурга (Германія) не прэнеглі магчымасцю наведаць знакамітую «Сцяжынку ў кронах дрэў» у Верхнім Фогельсбергу, адначасова зазірнуўшы ў тамтэйшы Біясферны дом. Сцяжынка – унікальнае збудаванне, якое дазваляе турыстам шпацыраваць паміж дрэвамі на вышыні, якая дасягае ў асобных месцах сарака метраў, са агляднымі пляцоўкамі і чучаламі-цацкамі, што шчабечуць галасамі птушак, якія насяляюць тыя мясціны. Біясферны дом – гэта чатырохпавярховы шкляны будынак з сонечнай батарэяй на даху, трыма тэматычнымі музеямі ўнутры, праўдападобнымі панарамамі мясцовасці, кіназалай у выглядзе мурашніка… і г.д.
У апошні дзень знаходжання быў арганізаваны круглы стол па падвядзенні вынікаў семінара і разгледжаны пытанні далейшага развіцця міжнароднага супрацоўніцтва ў рамках прапаганды экалагічнай адукацыі. Характэрна, што ў будучыні магчымы абмен не толькі вопытам спецыялістаў, але і групамі (класамі) вучняў.
Яўгенія ЛЯХ.
На здымку: Дыяна Сімановіч паднімаецца па «Сцяжынцы ў кронах дрэў» (Германія).
