Міжкультурны фестываль

Фестываль міжкультурных камунікацый (англійская і нямецкая мовы) сярод вучняў сярэдніх агульнаадукацыйных устаноў праводзіўся на Лепельшчыне ў шосты раз. Міжкультурны фестываль — гэта дыялог, які вучні вядуць на замежнай мове. На сцэне школьнікі праяўляюць сябе ў ролі аратора, турыстычнага гіда, журналіста, акцёра… Добры ўзровень валодання замежнай мовай, якасць вымаўлення, артыстызм — неабходныя ўмовы для добрага выступлення. Бо без зносін нават самая «жывая» мова можа знікнуць з лінгвістычнай карты.

Пра вынікі конкурсу мы гаворым з настаўніцай англійскай мовы сярэдняй школы №3 Крысцінай Ёда, якая з вучнямі 7 — 10 класаў перамагла ў намінацыі «Міні-тэатр».

Усяго намінацый пяць: «Я — гід» (расказаць пра славутасці краін-носьбітаў мовы), «Я — аратор» (чалавек, якому я ўдзячны), «Прэс-цэнтр» (школа будучыні), «Фабрыка зорак» (песеннае альбо танцавальнае выступленне) і «Міні-тэатр».

Адзін з галоўных крытэрыяў выбару — аўтэнтычнасць твора (у залежнасці ад выбранай мовы), п'есы або апавяданні англійскай альбо нямецкай літаратуры. Пасля доўгіх разважанняў вырашылі паказаць гатычна-гумарыстычную навелу «Кентэрвільскае прывід» англа-ірландскага драматурга 19-га стагоддзя Оскара Уайльда. Гатаваліся доўга, заставаліся пасля заняткаў з дзецьмі, рэпетыравалі ролі і рухі на сцэне. Ды і сам сцэнарый давялося перапрацоўваць некалькі разоў, падбіраць музыку.

Настаўніца абслугоўваючай працы Ірына Кунчэўская дапамагла зрабіць касцюмы. Летась тэатраў было чатыры, сёлета — два. Акрамя нас — калектыў вучняў сярэдняй школы №1. «Міні-тэатр» — адна з самых займальных, але разам з тым няпростых форм.

Бо дзе дзеці ўсе розныя, хтосьці крыху саромеецца на сцэне, хвалюецца, хтосьці ў самы непрыдатны момант можа забыць словы. Але ў нас захаваўся «касцяк» з мінулага года, калі мы выйгралі раённы фестываль з пастаноўкай «Маўглі» і выступалі на абласным. Бо канкурэнцыя была вельмі вялікая — установы адукацыі з Віцебска, Полацка, Оршы… Адзначу і іншых нашых прызёраў — хлопцы ў намінацыі «Прэс-цэнтр» і Яна Стрэльчанка ў «Фабрыцы зорак» заваявалі трэцяе месца, у намінацыі «Я — аратар» Андрэй Красковіч таксама стаў двухразовым прызёрам.

Добра хлопцы выступілі і ў іншых намінацыях. Настаўніца англійскай мовы Валянціна Логанцова падрыхтавала пераможцаў у намінацыі «Я — гід» Аляксандра Каменскага, Анастасію Шаршнёву, Кацярыну Капшуль, Аляксандру Кунчэўскую. Маладыя «англичане» прадставілі нацыянальную кухню ў англамоўных краінах. Мікіта Карабань заняў другое месца ў намінацыі «Я — аратар», дыпломы другой ступені таксама ў Давіда Дымана і Ксеніі Галуза.

…У вобласці акрамя першых прызёраў з сярэдняй школы №3 таксама выступяць Ксенія Самахвал («Я — аратар», сярэдняя школа №1), Арцём Пшэнка і Кірыл Стрыжнёў («Прэс-цэнтр», сярэдняя школа №1), Марыя Захарынская, Анастасія Сездзіна, Аляксандр Ноўскі («Фабрыка зорак», гімназія ім. І. М. Ерашова), Дзіяна Ерыцян («Фабрыка зорак», Бароўская сярэдняя школа).

Гутарыў
Яўген НІКАЛАЕЎ.
На здымках: моманты выступлення ўдзельнікаў фестывалю.