20 чэрвеня, Віцебск /Дзіяна Курыло - БЕЛТА/. Па факце жорсткага абыходжання з бакланамі ў Чашніцкім раёне на возеры Лукомскае міліцыя праводзіць праверку, паведаміў карэспандэнту БЕЛТА начальнік Чашніцкага РАУС Міхаіл Дзядзічкін. У РАУС паступіла заява з мясцовага сельсавета аб тым, што ў калоніі бакланаў і чапель на возеры Лукомскае выяўлены дзясяткі птушанят бакланаў з адрэзанымі надклюўямі. Гэта стала падставай для праверкі. Першапачатковыя следчыя дзеянні прадугледжваюць устанаўленне кола асоб, якія могуць быць датычныя да гэтага факту. У цяперашні час апытваюцца паляўнічыя, рыбакі, адпрацоўваюцца бліжэйшыя населеныя пункты і прадпрыемствы, якія займаюцца развядзеннем рыбы, растлумачыў начальнік РАУС. Ён не выключыў, што запыты па гэтым факце будуць накіраваны і ў суседнія рыбгасы. Бакланы сілкуюцца рыбай і наносяць адчутную шкоду рыбнай гаспадарцы. У сувязі з гэтым птушка аднесена да непажаданых відаў. Начальнік РАУС не выключыў таго, што некаторыя рыбгасы або прыватныя арандатары могуць прымаць часткі тушак бакланаў як доказ іх адстрэлу, і зыходзячы з гэтага выплачваць паляўнічым узнагароджанне. На правядзенне праверкі адводзіцца дзесяць дзён, пасля чаго матэрыялы будуць перададзены ў Следчы камітэт для прававой ацэнкі. У адпаведнасці з заканадаўствам, за жорсткае абыходжанне з жывёламі прадугледжана адміністрацыйная адказнасць - пакаранне ў выглядзе штрафу. Паводле даных супрацоўнікаў міліцыі, у цяперашні час на востраве знаходзіцца не больш за два дзясяткі птушанят з адрэзанымі надклюўямі. "Колькасць пацярпелых птушак, пра якіх раней паведамлялася, моцна перабольшана", - лічыць начальнік РАУС. Такога ж меркавання прытрымліваецца і начальнік Чашніцкай раённай інспекцыі прыродных рэсурсаў і аховы навакольнага асяроддзя Юрый Чарняўскі. Начальнік раённай інспекцыі разам з прадстаўнікамі сельскага Савета, супрацоўнікамі міліцыі, прымаў удзел у абследаванні калоніі, дзе пацярпелі птушкі. У гутарцы з карэспандэнтам БЕЛТА ён паведаміў, што назваць дакладную колькасць скалечаных птушанят вельмі складана: яны яшчэ не ўсталі на крыло, але ўжо могуць узляцець на высокія дрэвы або скокнуць у ваду і зплысці, таму ўсе падлікі вельмі ўмоўныя. Аднак і ён перакананы, што гаварыць аб сотнях пацярпелых птушак няма падстаў.