28 сакавіка, Віцебск /Вольга Багачова - БЕЛТА/. Супрацоўнікі міліцыі Віцебскай вобласці за зімовы перыяд спынілі дзейнасць пяці злачынных груп, якія спецыялізаваліся на крадзяжах з дачных кааператываў. Аб гэтым паведаміў сёння журналістам начальнік УУС Віцебскага аблвыканкама Аляксандр Найденка, перадае карэспандэнт БЕЛТА. "Затрыманыя групы складаліся з 3-4 чалавек, якія ездзілі красці ў дачныя пасёлкі, як на працу. Напрыклад, за адной з груп значацца 15 эпізодаў злачыннай дзейнасці", - паведаміў начальнік УУС. Ён падкрэсліў, што прафілактыцы і спыненню гэтых злачынстваў надаецца самае пільная ўвага з боку праваахоўных органаў: рэгулярна праводзіцца шмат прафілактычных мерапрыемстваў у рэгіёнах вобласці, сустрэчы з людзьмі ў працоўных калектывах, па месцы жыхарства. "Уся гэтая праца дае пэўны вынік: па раскрыцці крадзяжоў Віцебская вобласць займае трэцяе месца ў рэспубліцы. Акрамя таго, за 3,5 года нам удалося папярэдзіць каля 2,5 тыс. крадзяжоў", - падвёў вынік Аляксандр Найденка. Усяго з пачатку года па стане на 28 сакавіка ў Віцебскай вобласці здзейснена амаль 1,6 тыс. крадзяжоў, што на 150 выпадкаў больш у параўнанні з аналагічным перыядам мінулага года. Пры гэтым 75% крадзяжоў здзейснена з жылых памяшканняў шляхам свабоднага доступу, калі пасля шапачнага знаёмства са выпадковымі знаёмымі, якое суправаджалася распіццём спіртных напояў, людзі запрашаюць іх да сябе ў дом, а потым выяўляюць прапажу тэлефонаў, каштоўных рэчаў, грошай. З дач за зімовы перыяд (з лістапада 2011 года па цяперашні час) у рэгіёне здзейснена 160 крадзяжоў, што на 2% больш у параўнанні з узроўнем мінулага года.-0-

БЕЛТА