11 жніўня, Мінск /Кар. БЕЛТА/. Памер месячнай мінімальнай заработнай платы (МЗП) за ліпень бягучага года індэксуецца, як і ў папярэднім месяцы, на 5,4%. Гэта абумоўлена тым, што індэкс спажывецкіх цэн за ліпень не перавысіў пяціпрацэнтны парог да месяца яе папярэдняй індэксацыі (чэрвень 2016 года), паведамілі карэспандэнту БЕЛТА ў Міністэрстве працы і сацыяльнай абароны.

З 1 студзеня бягучага года месячная мінімальная заработная плата ўстаноўлена ўрадам у памеры Br2 млн 300 тыс. З улікам індэксацыі ў 5,4% памер МЗП у ліпені гэтага года складае Br239,18 (з улікам дэнамінацыі).

МЗП - дзяржаўны мінімальны сацыяльны стандарт у галіне аплаты працы, які наймальнік абавязаны прымяняць у якасці ніжэйшай мяжы аплаты працы работнікаў за працу ў нармальных умовах на працягу нармальнай працягласці працоўнага часу пры выкананні абавязкаў работніка, лакальных нарматыўных прававых актаў і працоўнага дагавора.

Грашовыя даходы (заработная плата, дзяржаўныя стыпендыі навучэнцам, стыпендыі клінічным ардынатарам, стыпендыі работнікам, накіраваным на павышэнне кваліфікацыі, перападрыхтоўку, стажыроўку ў вочнай (дзённай) форме навучання ў іншы населены пункт), атрымліваемыя з бюджэтных крыніц, і заработная плата дзяржаўных служачых і прыраўнаваных да іх асоб, грашовае забеспячэнне ваеннаслужачых, асоб радавога і начальніцкага складу, грашовае забеспячэнне ваеннаслужачых тэрміновай ваеннай службы, сувораўцаў, выхаванцаў воінскіх часцей, курсантаў ваенных навучальных устаноў за ліпень гэтага года не індэксуюцца, бо індэкс спажывецкіх цэн не перавысіў пяціпрацэнтны парог да месяца іх папярэдняй індэксацыі (красавік 2016 года).

Устаноўленыя ад базавай велічыні дапамогі па беспрацоўі і стыпендыі грамадзянам у перыяд прафесійнай падрыхтоўкі, перападрыхтоўкі і павышэння кваліфікацыі па накіраванні органа па працы, занятасці і сацыяльнай абароне гарадскога, раённага выканаўчага камітэта індэксуюцца на 5,4%, паколькі індэкс спажывецкіх цэн за ліпень не перавысіў пяціпрацэнтны парог да месяца іх папярэдняй індэксацыі (чэрвень 2016 года).

Насельніцтву, якое атрымлівае даходы на тэрыторыі рэспублікі з іншых крыніц, пакрыццё страт ад інфляцыі ажыццяўляецца па падставах, прадугледжаных калектыўнымі дагаворамі (пагадненнямі).