15 кастрычніка, Талачын /Дзіяна Курыло - БЕЛТА/. Мінсельгаспрад звязвае нездавальняючую працу жывёлагадоўчай галіны Віцебскай вобласці з парушэннем тэхналагічнай дысцыпліны і патрабуе ўвесці дыктатуру тэхналогій. Пра гэта сёння на нарадзе па выніках працы жывёлагадоўчай галіны рэгіёну за студзень-верасень 2012 года заявіў міністр сельскай гаспадаркі і харчавання Леанід Заяц, перадае карэспандэнт БЕЛТА. Па выніках працы за дзевяць месяцаў тэмп росту аб'ёмаў вытворчасці сельгаспрадукцыі ў грамадскім сектары ў Віцебскай вобласці склаў 101,1% да ўзроўню мінулага года, прытым што ў цэлым па рэспубліцы гэты паказчык дасягнуў 107,2%. У рэгіёне вырасла колькасць стратных сельскагаспадарчых і перапрацоўчых прадпрыемстваў. Такая праца аграпрамысловага сектара абумоўлена ў тым ліку нездавальняючым станам спраў у жывёлагадоўлі. У вобласці самыя нізкія па рэспубліцы паказчыкі прывагі жывёлы, надою на адну карову, валавой вытворчасці малака і яго рэалізацыі, канстатаваў Леанід Заяц. На яго думку, галоўныя прычыны такога становішча спраў крыюцца ў нізкай тэхналагічнай і выканаўчай дысцыпліне, адсутнасці кантролю за працай жывёлагадоўчай галіны з боку кіраўнікоў раёнаў і райсельгаспрад. У гэтым міністр пераканаўся асабіста, наведваючы фермы вобласці. "У вобласці неабходна ўсталяваць дыктатуру тэхналогій і строга пытаць за выкананне рэгламентаў кармлення і ўтрымання жывёл, але перш людзей неабходна гэтаму навучыць", - лічыць Леанід Заяц. Дзеючыя ў цяперашні час закупачныя цэны на малако і мяса робяць жывёлагадоўлю выгаднай сельгасвытворчасцю, адзначыў міністр. "Ферма - гэта манетны двор для любой гаспадаркі", - падкрэсліў ён. Выкананне тэхналогій дазволіць наросціць аб'ёмы вытворчасці, знізіць затраты, павысіць эфектыўнасць, што прывядзе да павелічэння прадукцыйнасці працы і росту заработнай платы як работнікаў ферм, так і спецыялістаў гаспадарак. Перад кіраўнікамі раёнаў Леанід Заяц паставіў задачу да канца года павялічыць вытворчасць малака на 10% у параўнанні з 2011-м і на 1 кг павялічыць надоі ад адной каровы. Сітуацыю ў жывёлагадоўчай галіне Віцебскай вобласці міністр узяў пад асабісты кантроль.-0-

БЕЛТА