29 верасня, Віцебск /Дзіяна Курыла - БЕЛТА/. Мітрапаліт Мінскі і Слуцкі Філарэт, Патрыяршы Экзарх усяе Беларусі, здзейсніць чын асвячэння Свята-Успенскага кафедральнага сабора Віцебска. Урачыстая цырымонія пройдзе 30 верасня пры ўдзеле архіерэяў Беларускай праваслаўнай царквы, а таксама высокапастаўленых свяшчэннаслужыцеляў з Расіі і Украіны, паведамілі карэспандэнту БЕЛТА ў Віцебскай епархіі. Мітрапаліт Філарэт у саслужанні архіерэяў і мноства духавенства здзейсніць абрад, які з'яўляецца неабходнай умовай для магчымасці правядзення ў храме богаслужэнняў - Боскай літургіі. Свята-Успенскі храм пачалі аднаўляць у 1998 годзе. Тады Патрыярх Маскоўскі і ўсяе Русі Аляксій II заклаў капсулу з памятнай граматай у падмурак храма і асвяціў першы камень на будаўніцтве сабора. Восенню 2009 года будаўнічы сабор наведаў Патрыярх Кірыл, а 5 сакавіка бягучага года Патрыяршы Экзарх усяе Беларусі асвяціў ніжні храм у гонар Перамянення Гасподняга кафедральнага сабора. Свята-Успенскі сабор узведзены на высокім беразе ля зліцця Віцьбы з Заходняй Дзвіной. Будаўніцтва храма пачалося ў 1743 годзе. Аўтарам праекта і кіраўніком будаўнічых работ быў архітэктар Іосіф Фонтана. Па некаторых звестках, віцебскі сабор з'яўляўся паменшанай копіяй аднаго з храмаў Рыма, пабудаванага знакамітым архітэктарам Лонгі. Да сярэдзіны 30-х гадоў XX стагоддзя Свята-Успенскі сабор быў візітнай карткай Віцебска. У 1911 годзе была зроблена каляровая фатаграфія яго ўнутранага ўбрання. У 1936 годзе храм быў разбураны сапёрамі пад камандаваннем Пятра Рыгоранкі, які пазней стаў адным з вядомых дысідэнтаў і праваабаронцаў. Праект аднаўлення Свята-Успенскага сабора заснаваны на архіўных матэрыялах і з'яўляецца дакладнай копіяй разбуранага. Памер храма - 55 м на 33 м. Вышыня галоўнага купала храма складае каля 50 м, а дзве званіцы ўзняліся ўвышкі амаль на 40 м. Па задуме архітэктараў, да падножжа храма з набярэжнай вядуць шырокія лесвіцы. На дзвюх званіцах сабора ўстаноўлены 20 званоў, большай колькасці не мае ніводзін храм у вобласці. Сярод званоў сабора знаходзіцца і самы вялікі ў Беларусі. Яго вага складае 325 пудоў, вышыня 2 м, дыяметр - 2 м, вага чыгунавага языка - 180 кг. Яшчэ адной асаблівасцю галоўнага віцебскага храма з'яўляецца тое, што ўнутры, акрамя традыцыйных біблейскіх сюжэтаў, яго ўпрыгожваюць выявы святых зямлі Беларускай.