21 снежня, Віцебск /Вольга Багачова - БЕЛТА/. Мабільныя групы супрацоўнікаў міліцыі дапамогуць выратавацца ў мароз жыхарам Віцебскай вобласці, паведаміў карэспандэнту БЕЛТА намеснік начальніка ўпраўлення аховы правапарадку і прафілактыкі міліцыі грамадскай бяспекі УУС Віцебскага аблвыканкама Андрэй Іваноў. На перыяд моцных маразоў рашэннем УУС Віцебскага аблвыканкама пры кожным гарадскім і раённым аддзеле ўнутраных спраў рэгіёна з ліку супрацоўнікаў міліцыі ўтвораны мабільныя групы па выяўленні на вуліцах населеных пунктаў грамадзян, якія апынуліся з-за розных прычын (стан здароўя, алкагольнае ап'янэнне) у бездапаможным стане. У залежнасці ад сітуацыі пры выяўленні такіх людзей прадстаўнікі праваахоўных органаў будуць дастаўляць іх ва ўстановы аховы здароўя ці медвыцвярэзнікі. Не застануцца без увагі і асобы без пэўнага месца жыхарства. Ужо другі дзень у абласным цэнтры праходзіць акцыя "Нам важны кожны", у рамках якой супрацоўнікі міліцыі выяўляюць месцы збору бяздомных і дастаўляюць іх у гарадскі цэнтр часовага пражывання. Гэтая праца будзе праводзіцца на працягу ўсяго перыяду паніжаных тэмператур. Пры гэтым з 24 снежня супрацоўнікі УУС пераходзяць на ўзмоцнены варыянт нясення службы да заканчэння навагодніх і калядных святаў. На аналагічны рэжым работы з 22 снежня па 13 студзеня пераходзяць і супрацоўнікі Віцебскага абласнога ўпраўлення МНС. "Аднак у стане павышанай гатоўнасці да рознага роду сітуацый з улікам умоў надвор'я мы працуем ужо зараз", - падкрэсліла прэс-сакратар ведамства Марына Фандо. У прыватнасці, на выпадак надзвычайных здарэнняў падрыхтавана рэзервовая тэхніка, праінструктаваны асабовы склад, а напярэдадні ноччу адбыўся трэніровачны начны збор супрацоўнікаў па трывозе. Акрамя таго, вядзецца праверка жылога фонду. Арганізаваны выступленні з папярэджаннямі ў сродках масавай інфармацыі, бо з-за парушэння правіл пажарнай бяспекі, пакідання без нагляду печаў, абагравальнікаў і іншых крыніц ацяплення ў рэгіёне часцей сустракаюцца выпадкі пажараў у сараях, лазнях, гаражах.