17 студзеня, Ворша /Дыяна Курыло - БЕЛТА/. Старшыня Віцебскага аблвыканкама Аляксандр Косінец патрабуе паскорыць работы па мадэрнізацыі Аршанскага льнокамбіната і давесці сярэднюю заработную плату работнікаў у снежні 2012 года не менш за $500 у эквіваленце. Такі даручэнне губернатар паставіў сёння перад кіраўніцтвам рэспубліканскага ўнітарнага вытворча-гандлёвага прадпрыемства (РУВГП) "Аршанскі льнокамбінат" падчас рабочай паездкі, перадае карэспандэнт БЕЛТА. Даручэнні кіраўніка дзяржавы, дадзеныя на нарадзе ў сакавіку 2010 года аб правядзенні мадэрнізацыі камбіната з выхадам на тэхнічны ўзровень, які адпавядае лепшым сусветным вытворчасцям аналагічнага профілю, цалкам выконваюцца, канстатаваў Аляксандр Косінец. На прадпрыемстве рэалізуецца бізнес-план развіцця на 2010-2013 гады з выхадам на праектную магутнасць да 2015 года. Ужо набыта 43 адзінкі новай тэхнікі, усталёўваецца звыш дзясятка адзінак сучаснага фарбавальнага абсталявання. Такім чынам, Аршанскі льнокамбінат зможа павялічыць долю гатовых тканін у агульным аб'ёме вытворчасці з 1,5 млн. пагонных метраў да 4,5-5 млн. пагонных метраў у год. У 2013 годзе плануецца набыць 175 высокапрадукцыйных ткацкіх станкоў. У гутарцы з журналістамі старшыня аблвыканкама падкрэсліў, што галоўнай задачай прадпрыемства з'яўляецца вытворчасць канкурэнтаздольных, запатрабаваных на рынку вырабаў - гатовых тканін, што дазволіць мець высокую дабаўленую вартасць, і запатрабаваў ад кіраўніцтва паскорыць работы па рэалізацыі бізнес-плана, мантажы набытага абсталявання і ўводзе яго ў строй. "Гэта дасць магчымасць павелічэння заработнай платы, якая да снежня 2012 года павінна складаць $500 у эквіваленце супраць Br3 млн. у снежні 2011 года", - сказаў ён. Акрамя таго, Аляксандр Косінец звярнуў увагу на неабходнасць стварэння спрыяльных умоў працы работнікаў - найхутчэйшы ўвод у строй вентыляцыйных сістэм у цэхах. Аршанскаму гарвыканкаму даручана разгледзець пытанне аб прывядзенні ў парадак дзіцячага аздараўленчага лагера, перададзенага Аршанскім льнокамбінатам на баланс горада для таго, каб стварыць там сучасны комплекс, у якім маглі б адпачываць як дзеці, так і самі работнікі камбіната.