VIII абласны водны турысцкі паход, прысвечаны 75-годдзю вызвалення Беларусі ад нямецка-фашысцкіх захопнікаў, пройдзе 21-23 чэрвеня ў Браслаўскім раёне, паведамілі БЕЛТА ў Віцебскім абласным камітэце БРСМ.
Водны турысцкі паход пройдзе па возеры Дрывяты - самым буйным у Браслаўскім раёне. Удзельнікамі стануць працуючая моладзь прадпрыемстваў і арганізацый Віцебскай вобласці і члены БРСМ.
У першы дзень маладыя людзі пазнаёмяцца з міфалагічнай спадчынай рэгіёна, яе легендамі, пройдуць пасвячэнне ў водныя турысты і стануць удзельнікамі конкурсу ваенных песень ля вогнішча.
На наступны дзень адбудзецца урачысты мітынг і ўскладанне кветак да помніка вызваліцелям аграгарадка Ахрэмаўцы. Удзельнікі паходу правядуць экалагічную акцыю рэспубліканскага праекта "#ЗаДело!" і добраўпарадкуюць воінскае пахаванне. Таксама ў гэты дзень пройдуць спаборніцтвы з паласой перашкод і гістарычная гульня "Кладоискатели". У апошні дзень паходу будуць падведзены вынікі і ўзнагароджаны ўдзельнікі і пераможцы конкурсаў.
Арганізатарамі мерапрыемства выступілі Віцебскі абласны камітэт БРСМ, галоўнае ўпраўленне ідэалагічнай работы, культуры і па справах моладзі аблвыканкама і Браслаўскі райвыканкам.