9 верасня, Мінск /Ганна Кот - БЕЛТА/. Маладзёжны інавацыйны форум упершыню пройдзе ў Беларусі ў лістападзе 2010 года. Пра гэта было заяўлена сёння на першым пасяджэнні аргкамітэта па падрыхтоўцы і правядзенні форуму, перадае карэспандэнт БЕЛТА. Папярэдняя назва форуму - "Моладзь. Інавацыі. Будучыня". Мэта мерапрыемства - стымуляваць удзел моладзі ў пабудове інавацыйнай эканомікі Беларусі, абазначыць неабходнасць вырашэння канкрэтных дзяржаўных задач маладзёжнай палітыкі ў навуковай, вытворчай і сацыяльнай сферах. Удзел у мерапрыемстве возьмуць каля 400 дэлегатаў. Інавацыйныя праекты будуць прадстаўлены па наступных напрамках: тэхналагічныя інавацыі і вынаходніцтва; інфарматыка і радыёэлектроніка; тэхніка і матэрыялы будучыні; інавацыйныя біятэхналогіі і нанатэхналогіі. Форум працягнецца два дні і ўключыць у сябе выставу навуковых дасягненняў, працу па секцыях, школу-семінар "Менеджмент інавацый", анлайн-канферэнцыю з рэгіёнамі. Мерапрыемства пройдзе на базе Нацыянальнай бібліятэкі Беларусі. "Вялікія навуковыя форумы па розных напрамках праходзяць на тэрыторыі ўстановы не ў першы раз. Бібліятэка - гэта месца, дзе захоўваюцца ідэі, дзе ж іх абмяркоўваць, як не ў нас", - упэўнены дырэктар НББ Раман Матульскі. Па яго словах, "асноўныя контуры мерапрыемства ўжо вызначаны, цяпер трэба вырашыць арганізацыйныя моманты". Падчас Маладзёжнага інавацыйнага форуму адбудзецца ўзнагароджанне лаўрэатаў рэспубліканскага конкурсу інавацыйных праектаў у намінацыі "Лепшы маладзёжны інавацыйны праект". Пераможцам і прызёрам конкурсу будуць уручаны дыпломы і прэміі - 50 базавых велічынь за першае месца і 30 і 20 базавых велічынь за другое і трэцяе месца адпаведна (базавая велічыня складае Br35 тыс.). Галоўная мэта мерапрыемства - пошук і наступная рэалізацыя перспектыўных інавацыйных праектаў, а таксама іх камерцыялізацыя.