Маладым – усюды ў нас дарога! | Лепельский райисполком

Якія прывілеі чакаюць маладога спецыяліста на працоўным месцы? Ці можа ён разлічваць на льготны крэдыт і як вырашыць жыллёвыя праблемы? Не адно пытанне ўзнікае ў нядаўняга выпускніка. Атрымаць кампетэнтныя адказы на іх маладыя спецыялісты змаглі на традыцыйным злёце ў РДК.

Ваенныя, медыкі, выкладчыкі – са 125 выпускнікоў па размеркаванні прадстаўнікоў гэтых прафесій на Лепельшчыну прыбыло больш за ўсё.

Сённяшнія маладыя спецыялісты прайшлі «школу баявога хрышчэння»: за плячыма - паўгода працы. Як вырашыць праблемы, з якімі яны паспелі сутыкнуцца, расказалі прадстаўнікі вядучых службаў горада. На ўваходзе ў залу маладыя спецыялісты атрымалі памятку, якая коратка і лаканічна закранула асноўныя сферы жыцця - ад заканадаўчай базы, якая рэгулюе працоўную дзейнасць, да дзейнасці ГА «БРСМ». У ёй жа можна было знайсці і карысныя кантакты.

Удасканалення ў прафесійнай дзейнасці і кар'ернага росту, -- пажадаў маладым спецыялістам намеснік старшыні райвыканкама Мікалай Нікіцін.
Што чакае ў вырашэнні пытання аб будаўніцтве жылля, крэдытах і ўмовах кантракту, адказаў начальнік аддзела жыллёва-камунальнай гаспадаркі райвыканкама Мікалай Пшонка.

Намеснік начальніка аддзела рознічнага бізнесу ААТ «ААБ Беларусбанк» Наталля Носік, расказала аб прадастаўленні льготнага крэдыту тэрмінам да 15 гадоў, па спісах, зацверджаных райвыканкамам.

Звярнуць увагу на правільнасць заключэння кантракту, азнаёміцца з парадкам павышэння кваліфікацыі, а таксама прасачыць за выплатай пад'ёмных параіў маладым спецыялістам начальнік упраўлення па працы, занятасці і сацыяльнай абароне райвыканкама Васіль Рававы.

У сваю чаргу, уважлівымі пры разрыве адносін параіла быць маладым людзям начальнік аддзела ЗАГС Алена Бельская. Не будзе лішнім паспяшацца тым, хто вырашыў зарэгістраваць свае адносіны ў гэтым годзе: папярэдні запіс ідзе ўжо на кастрычнік. Дарэчы, тым, хто вырашыўся згуляць вяселле, Алена Канстанцінаўна прапануе ў якасці альтэрнатывы звычайнай рэгістрацыі выязную.

«Чым заняць свой вольны час?» - для маладых спецыялістаў у маленькім горадзе і гэта можа стаць праблемай. Адзін з яе рашэнняў падказала старшыня раённай арганізацыі ГА «БРСМ» Таццяна Шчарбач. Дарэчы, сёння са 1657 членаў раённай арганізацыі больш за палову – вайскоўцы і працоўная моладзь.

За актыўны адпачынак агітаваў маладых спецыялістаў дырэктар фізкультурна-аздараўленчага цэнтра Рымантас Стрыпейкіс. Ён падкрэсліў, што ў ФАЦ 48 груп, у 26 з якіх займаюцца дарослыя. Разнастаіць вольны час культурнай дзейнасцю прапанавала намеснік начальніка аддзела ідэалагічнай работы, культуры і па справах моладзі Тамара Бароха.

Вечар быў не толькі карысным, але і вясёлым: настрой сваім выступленнем паднялі работнікі РДК. Ужо пасля злёту маладыя спецыялісты змаглі атрымаць патрэбныя кансультацыі. У сваю чаргу, у ананімнай анкеце яны расказалі аб праблемах, з якімі паспелі сутыкнуцца. Вынікі гэтага даследавання будуць выкарыстаны райвыканкамам для ўдасканалення работы з маладымі спецыялістамі.

Кацярына АСОЎСКАЯ.

На здымках: маладыя ўрачы; загадчыка майстэрнямі ААТ «Лядна» Аляксея Лебедзева кансультуе начальнік упраўлення па працы, занятасці і сацыяльнай абароне райвыканкама Васіль Рававы.

Фота аўтара.