25 студзеня, Віцебск /Дзіяна Курыло - БЕЛТА/. Музей беларускага кнігадрукавання - філіял Нацыянальнага Полацкага гісторыка-культурнага музея-запаведніка адкрывае выставачны сезон Года кнігі выставай кніг - лаўрэатаў 50-га нацыянальнага конкурсу "Мастацтва кнігі-2010" і VII Міжнароднага конкурсу "Мастацтва кнігі" краін - удзельніц СНД, паведаміла карэспандэнту БЕЛТА загадчыца філіяла Алена Шумовіч. Лепшыя кнігі Беларусі па выніках конкурсу перададзены ў фонд музея Міністэрствам інфармацыі. Калекцыю папоўнілі 470 кніг, навучальных дапаможнікаў. З усімі з іх можна азнаёміцца на адкрытай выставе. Добрая традыцыя перадачы ў фонды музея кніг - лаўрэатаў конкурсу склалася ў пачатку 90-х гадоў мінулага стагоддзя. З 1991 года Міністэрствам інфармацыі перададзена каля 5 тыс. выданняў, якія атрымалі прызнанне прафесіяналаў кнігадрукавання. Варта адзначыць, што ў музейнай калекцыі ёсць і лепшыя беларускія кнігі, прызнаныя такімі яшчэ на савецкіх конкурсах 50-60-х гадоў XX стагоддзя. У найбліжэйшых планах музея тэматычныя выставы кніг, прысвечаныя Полацку, які ў 2012 годзе святкуе 1150-годдзе, юбілеям класікаў беларускай літаратуры Янкі Купалы і Якуба Коласа. Спецыяльная экспазіцыя факсімільных і рэпрынтных выданняў рыхтуецца да Дня беларускага пісьменства, прымаць які сёлета будзе Глыбокае. На думку Алены Шумовіч, Год кнігі ў Беларусі закліканы падтрымаць цікавасць да друкаванага слова. "Супрацоўнікі музея клапоцяцца аб захаванні і данясенні да наведвальнікаў роднага слова, стараюцца вучыць іх паважаць і берагчы сваю мову, сваю культурную спадчыну - кнігу. Падарожжа па залах музея выхоўвае не толькі гонар за вялікіх беларускіх асветнікаў: Ефрасінню Полацкую, Францыска Скарыну, Сымона Полацкага, Васіля Цяпінскага, тых, хто садзейнічаў развіццю пісьменнасці, асветы, ведаў, але і за сучаснікаў, стараннем якіх ствараецца кніга сучасная", - адзначыла суразмоўніца.