Мужчыны працуюць больш, чым жанчыны, але менш заняты хатнімі справамі

18.12.20150 праглядаў

У Беларусі працуючыя мужчыны ў сярэднім у дзень працуюць на 1 гадзіну 26 хвілін больш, чым жанчыны. А працуючыя жанчыны на 2 гадзіны 19 хвілін даўжэй займаюцца вядзеннем хатняй гаспадаркі. Такія даныя агучыла начальнік упраўлення статыстыкі ўзроўню жыцця насельніцтва і абследаванняў хатніх гаспадарак Нацыянальнага статыстычнага камітэта Іна Канашонак на пасяджэнні круглага стала на тэму "Выкарыстанне сутачнага фонду часу насельніцтвам Рэспублікі Беларусь", перадае карэспандэнт БЕЛТА.

"Працоўны дзень жанчын пачынаецца крыху пазней, чым у мужчын, калі гаворка ідзе аб аплачванай працы: у 8 гадзін раніцы да працы прыступаюць 27% мужчын і 33% жанчын. Калі ж разглядаць неаплачваную працу, гэта значыць час на вядзенне хатняй гаспадаркі, то тут карціна супрацьлеглая: у 8 гадзін раніцы гэтым відам дзейнасці займаюцца 14% жанчын і толькі 7% мужчын, - адзначыла прадстаўнік Белстата. - Неаплачваная праца жанчын на працягу дня пастаянна дамінуе над неаплачванай працай мужчын, хоць па аплачванай працы гэта не моцна заўважна. І пры гэтым неаплачваная праца жанчын больш працяглая ў вячэрні час".

Насельніцтва рэспублікі ва ўзросце 10 гадоў і старэй 3 гадзіны 46 хвілін (або 16%) траціць на працу і звязаную з ёй дзейнасць, 4 гадзіны 35 хвілін (19%) - на вядзенне хатняй гаспадаркі, догляд за дзецьмі, дапамогу сваякам і сябрам, навучанне, 4 гадзіны 36 хвілін (19%) складае вольны час.

Структура сутачнага фонду часу адрозніваецца па буднях і выхадных днях. На адны і тыя ж віды дзейнасці жанчыны і мужчыны трацяць розны час. Найбольшыя разыходжанні ў структуры выкарыстання часу паміж працуючымі жанчынамі і мужчынамі назіраюцца ў трох групах: вядзенне хатняй гаспадаркі і догляд за дзецьмі, занятасць і вольны час.

Так, жанчыны надаюць больш часу вядзенню хатняй гаспадаркі і догляду за дзецьмі (4 гадзіны 36 хвілін), адпачынку (4 гадзіны 15 хвілін у дзень) і працы (3 гадзіны 12 хвілін). Мужчыны найбольш часу заняты адпачынкам (5 гадзін 6 хвілін), затым працай (4 гадзіны 38 хвілін), вядзеннем хатняй гаспадаркі і доглядам за дзецьмі (2 гадзіны 17 хвілін).

Як паказала абследаванне хатніх гаспадарак, насельніцтва рэспублікі не мае выразна ўстаноўленага часу для прыёму ежы - прыёмы ежы размеркаваны на працягу ўсяго дня.

Пік сну прыпадае на начны час. Вольны час і прагляд тэлебачання таксама разнесены на працягу дня, асабліва ў вячэрні час. Пры гэтым працуючыя жанчыны глядзяць тэлевізар крыху менш, чым мужчыны. Цікава адзначыць, што ў 21.30 глядзіць тэлевізар 33 са 100 жанчын і 40 са 100 мужчын. Гэты час з'яўляецца самым пікавым па праглядзе тэлебачання.

На круглым стале адбылася прэзентацыя вынікаў выбарачнага абследавання хатніх гаспадарак, праведзенага Белстатам у 2015 годзе пры падтрымцы Дзіцячага фонду ААН (ЮНІСЕФ) і Фонду ААН у галіне народанасельніцтва (ЮНФПА). У абследаванні прынялі ўдзел 6 тыс. хатніх гаспадарак (11 тыс. чалавек), якія пражываюць ва ўсіх абласцях і Мінску. Вынікі абследавання дазволілі атрымаць дэталізаваны партрэт сацыяльных паводзін мужчын і жанчын, дарослых і дзяцей, гараджан і вяскоўцаў, вывучыць каштоўнасныя арыентацыі і матывацыі баўлення часу па асобных групах насельніцтва і тыпах хатніх гаспадарак.

Навіны Беларусі (БЕЛТА)