Камітэтам дзяржаўнай маёмасці Віцебскага аблвыканкама на аўкцыёне прададзены аб'ект незавершанага будаўніцтва жаночай паліклінікі па вуліцы Багдана Хмяльніцкага, 28 у горадзе Віцебску.
Новым уласнікам стала прыватная будаўнічая арганізацыя з горада Мінска, якая ўжо мае вялікі досвед працы ў сферы жылой і камерцыйнай нерухомасці ‒ арганізацыя больш за 30 гадоў працуе ў будаўнічым бізнесе. У ліку праектаў, што рэалізуюцца, і віцебскі жылы комплекс «Новая Чарняхоўка».
У будучыні, на месцы паліклінікі, разглядаецца магчымасць будаўніцтва шматкватэрнага жылога дома вышынёй да сямі паверхаў.
Кошт продажу склаў тры базавыя велічыні. Але пакупніку таксама неабходна пакрыць затраты на рэканструкцыю ў памеры 1,315 мільёна рублёў.
Работы па рэканструкцыі паліклінікі былі пачаты яшчэ ў лютым 2012 года, але з-за фінансавых цяжкасцей будаўніцтва было замарожана.
Першапачаткова будынак быў пабудаваны як радзільны дом №2 горада Віцебска. У час Вялікай Айчыннай вайны тут знаходзіўся нямецкі лазарэт. Пазней ён выкарыстоўваўся як гінекалагічнае аддзяленне радзільнага дома №1 горада Віцебска.
За апошнія гады камітэт беспаспяхова 17 разоў выстаўляў будынак паліклінікі на аўкцыён, у тым ліку на 13 аўкцыёнах аб'ект прапаноўваўся за базавую велічыню.
Па ўмовах продажу новы ўласнік павінен правесці работы па ўзвядзенні жылых памяшканняў у тэрмін згодна з праектна-каштарыснай дакументацыяй, але не пазней пяці гадоў з даты набыцця аб'екта.
Усяго на красавік камітэтам прызначана 103 аўкцыёны па продажы невыкарыстоўваемых аб'ектаў дзяржаўнай маёмасці, большасць з якіх можна набыць за базавую велічыню.
З пачатку года камітэт правёў 32 выніковых аўкцыёны. Дзяржаўны бюджэт пры гэтым папоўніўся на суму 1,7 мільёна рублёў.