18 верасня, Мінск /Кар. БЕЛТА/. На парламенцкіх выбарах 2012 года ўзмацнены меры па абароне выбарчых скрынь падчас датэрміновага галасавання. Аб гэтым карэспандэнту БЕЛТА паведаміў сакратар Цэнтрвыбаркама Беларусі Мікалай Лазавік. У адпаведнасці з тымі змяненнямі і дапаўненнямі, якія былі ўнесены ў выбарчае заканадаўства, узмацнены меры па абароне скрынь падчас датэрміновага галасавання. "У прыватнасці, пры пачатку галасавання на мінулых выбарах можна было прысутнічаць усяго двум членам участковай камісіі, цяпер закон патрабуе, каб прысутнічала не менш за дзве траціны ад складу участковай камісіі", - растлумачыў Мікалай Лазавік. Датэрміновае галасаванне на выбарах дэпутатаў Палаты прадстаўнікоў Нацыянальнага сходу Беларусі пачалося сёння і працягнецца да 22 верасня ўключна. Усе ўчасткі, на якіх можна прагаласаваць, ужо адкрыліся. Графік іх работы: з 10 да 14 і з 16 да 19 гадзін. Пасля заканчэння кожнага дня галасавання прарэз на скрыні заклейваецца лістом, на якім ставяць подпісы старшыня і член участковай камісіі. Памяшканне, дзе знаходзіцца скрыня, здаецца пад ахову работніку аддзела ўнутраных спраў. "Калі ў памяшканні, дзе праводзіцца датэрміновае галасаванне, нікога няма і ў перыяд паміж ранішнім і вячэрнім галасаваннем, то прарэз у скрыні таксама заклейваецца. Такім чынам, адмятаюцца домыслы аб тым, што можа быць укідам бюлетэняў, калі на выбарчым участку няма членаў камісіі і назіральнікаў", - падкрэсліў Мікалай Лазавік. Сакратар ЦВК дадаў, што пад аховай супрацоўнікаў міліцыі знаходзяцца не толькі памяшканні для галасавання, але і прылеглая тэрыторыя. Такія меры закліканы забяспечыць грамадзянам бяспеку і спакой падчас правядзення ўсіх выбарчых працэдур, адзначыў Мікалай Лазавік. Пры гэтым для агітацыі якіх-небудзь абмежаванняў няма. "Выбарчае заканадаўства кажа аб тым, што агітацыя немагчыма толькі ў памяшканні для галасавання", - сказаў сакратар Цэнтрвыбаркама. Датэрміновае галасаванне ў Беларусі пройдзе на 6037 участках, адкрытых па месцы жыхарства выбаршчыкаў, а таксама на 39 участках, утвораных у воінскіх часцях, і на 43 замежных. На 268 участках, утвораных у санаторыях, прафілакторыях, дамах адпачынку, бальніцах і іншых стацыянарных лячэбна-прафілактычных установах, датэрміновае галасаванне праводзіцца не будзе. Там спісы выбаршчыкаў складаюцца за два дні да выбараў, і галасаванне пройдзе 23 верасня 2012 года.