5 лютага, Мінск /Ганна Кот – БЕЛТА/. ААТ "Нафтан" за 2011 год павялічыла вытворчасць прамысловай прадукцыі ў 2,5 раза ў параўнанні з 2010-м, паведамілі карэспандэнту БЕЛТА на прадпрыемстве. Аналагічны вынік дасягнуты ў плане тэмпу росту прадукцыйнасці працы. Паказчык па энергазберажэнні склаў мінус 10,2% (план таксама перавыкананы). Больш чым у 2 разы павялічана выкарыстанне мясцовых відаў паліва, другасных энергетычных рэсурсаў, нетрадыцыйных і аднаўляльных крыніц энергіі. Прадпрыемства надае значную ўвагу пашырэнню асартыменту прадукцыі. У другой палове 2011 года спецыялісты ААТ "Нафтан" асвоілі вытворчасць маторных маслаў для бензінавых рухавікоў катэгорый па API SJ/CD і SL/CF розных вязкасных уласцівасцей. Пачатак іх рэалізацыі запланаваны на вясну. Распрацоўка інавацыйных прадуктаў хімічнай вытворчасці вядзецца галоўным чынам у напрамку стварэння кампазіцыйных матэрыялаў на аснове палімераў і поліэтыленавых плёнак, якія выпускаюцца заводам "Палімір", што ўваходзіць у склад ААТ "Нафтан". Шляхам падбору тэхналагічных рэжымаў сінтэзу на дзеючым абсталяванні ўдалося атрымаць і новую марку поліэтылену высокага ціску - ПЭВД 12203-250. "Палімір" стаў яе адзіным вытворцам у СНД. Яна можа выкарыстоўвацца для ламінавання паперы і кардону, а таксама вытворчасці суперканцэнтратаў пігментаў і фарбавальнікаў (так званы майстар-батч). Акрамя таго, у цяперашні час цэнтральная лабараторыя "Паліміра" распрацоўвае кабельна-ізаляцыйныя кампазіцыі на базе ПЭВД маркі 12903-003, якая дазваляе дамагчыся высокай якасці прадукцыі без увядзення мадыфікуючых дабавак; кабельна-ізаляцыйныя кампазіцыі з дэзактыватарам медзі, які дазваляе павялічыць тэрмін службы кабельных вырабаў; плёначныя кампазіцыі з дабаўкамі, якія павышаюць слізгаценне і перашкаджаюць зліпанню плёначнага рукава; плёнкі з антыстатычным і слізгальным эфектам, палепшанай раскрывальнасцю рукава (гэтая прадукцыя запатрабавана ў якасці ўпаковачнага матэрыялу). У 2011 годзе "Нафтан" перапрацаваў больш за 10 млн.т нафты, у тым ліку каля 1 млн.т "чорнага золата" з Венесуэлы. Праграмай развіцця ААТ "Нафтан" на 2010–2015 гады прадугледжана павелічэнне аб'ёму перапрацоўкі нафты да 12 млн.т у год. Доля перапрацоўкі ўласнай нафты склала амаль 62%. Тэмп росту гэтага паказчыка ў параўнанні з 2010 годам - звыш 123%. Завод "Палімір" ААТ "Нафтан" перапрацаваў больш за 530 тыс.т вуглевадароднай сыравіны, што на 7% больш, чым у 2010-м.