27 верасня, Мінск /Таццяна Лобас - БЕЛТА/. Паляўнічыя гаспадаркі Мінлясгаса з пачатку года атрымалі Br5,1 млрд. даходаў ад паляўнічай дзейнасці пры плане на 9 месяцаў Br3 млрд. 470 млн., заданне па атрыманні даходаў за студзень-верасень перавыканана на 47%. Пра гэта карэспандэнту БЕЛТА паведаміў начальнік аддзела паляўнічай гаспадаркі Мінлясгаса Беларусі Сяргей Шастакоў. Плановыя паказчыкі перавыканалі ўсе абласныя лесагаспадарчыя аб'яднанні. Пры гэтым больш за ўсё даходаў ад вядзення паляўнічай гаспадаркі ў бягучым годзе атрымалі лесгасы Віцебскага і Мінскага дзяржаўных вытворчых лесагаспадарчых аб'яднанняў - адпаведна Br1,227 млрд. і Br1,116 млрд. Менш за ўсё зарабілі лесгасы Гомельскай вобласці - Br465 млн. З пачатку года ад правядзення паляўнічых тураў з удзелам замежных грамадзян паляўнічыя гаспадаркі, па дадзеных на 23 верасня, атрымалі Br1,718 млрд. пры плане 9 месяцаў Br1,048 млрд. Заданне дзевяці месяцаў перавыканана на 64%. Найбольш актыўна ў гэтым напрамку працавалі лесгасы Віцебскай вобласці, якія атрымалі даходаў на суму Br491 млн. Менш за ўсё даходаў ад правядзення паляўнічых тураў маюць лесгасы Гомельскай вобласці - Br114 млн. Даходы ад эксплуатацыі паляўнічых домікаў за няпоўныя 9 месяцаў узраслі на 29% і склалі Br1 млрд. 537 млн. пры плане на 9 месяцаў Br1 млрд. 190 млн. На паляванне ў Беларусь у бягучым годзе прыязджалі турысты з Расіі, Германіі, краін Балтыі, Іспаніі, Італіі, Францыі. З пачатку года праведзена больш за 250 паляўнічых тураў для замежнікаў. У цяперашні час праходзіць сезон палявання на лася, аленя. Гэты від палявання на трафейных дзікіх жывёл асабліва прыцягвае замежных паляўнічых. У 2011 годзе ад вядзення паляўнічай гаспадаркі плануецца атрымаць Br7,6 млрд. даходаў, у тым ліку ад паляўнічых тураў з удзелам замежных грамадзян - каля Br2,6 млрд., ад эксплуатацыі паляўнічых домікаў - Br1,9 млрд.