Праца з'яўляецца асновай развіцця краіны і дабрабыту. Пра гэта заявіў старшыня абласнога Савета дэпутатаў Дзмітрый Дзямідаў, напярэдадні Першамая ўзнагароджваючы пераможцаў конкурсу прафмайстэрства «Майстар года Віцебшчыны – 2024».
– За дасягненнямі любога прадпрыемства стаіць калектыў, у якім кожны на сваім месцы стварае агульны поспех. Аснова дзяржаўнай палітыкі ў нашай краіне – справядлівае стаўленне да людзей, – падкрэсліў Дзмітрый Дзямідаў. – Па добрай традыцыі напярэдадні 1 мая прафсаюз падводзіць вынікі конкурсу прафмайстэрства, тым самым папулярызуючы рабочыя спецыяльнасці і прафесіі, адзначаючы лепшых і адданых выбранаму шляху людзей. Настаўнікі, урачы, будаўнікі, прадстаўнікі іншых галін народнай гаспадаркі сваёй працай забяспечваюць наш дабрабыт. Упэўнены, для маладога пакалення кожны з вас будзе служыць прыкладам.
Узнагароды за працу ўручылі 17 прадстаўнікам розных сфер эканомікі паўночнага рэгіёну – гэта працаўнікі сельскай гаспадаркі, аховы здароўя, адукацыі, гандлю, нафтахімічнага комплексу, энергетыкі, сувязі, будаўнічай і іншых галін. Сярод іх – электраманцёр па выпрабаваннях і вымярэннях завода «Палімір» ААТ «Нафтан» Уладзіслаў Абалевіч.
– На прадпрыемства прыйшоў па размеркаванні ў 2019 годзе, ужо праз год апынуўся на п'едэстале прафмайстэрства завода. Упэўнены, што ў маёй справе ёсць куды імкнуцца і расці. Нядаўна да нас у брыгаду прыйшоў малады спецыяліст, з якім дзялюся вопытам, недзе падказваю, навучаю азам і тонкасцям прафесіі, – адзначыў Уладзіслаў Абалевіч.
Старшыня абласнога аб'яднання прафсаюзаў Юрый Дзеркач падкрэсліў, што да работнікаў розных сфер, ветэранаў працы, якія развівалі і працягваюць развіваць эканоміку краіны, заўсёды ставіліся з пашанай і павагай. Свята працы падкрэслівае стваральны характар народа, конкурс прафмайстэрства – гэта яшчэ адна нагода для гонару, для іншых – стымул да якаснай працы.
vitebsk-region.gov.by