5 ліпеня, Віцебск /Дзіяна Курыло - БЕЛТА/. Майстар-клас па зборы лекавых траў і іх выкарыстанні дадуць знакамітыя полацкія травнікі, распавялі карэспандэнту БЕЛТА ў аддзеле ідэалагічнай працы Полацкага райвыканкама. Па павер'ях, трава, сабраная напярэдадні купальскай ночы, валодае асаблівай гаючай і магічнай сілай. Вось і 27 полацкіх травніц - удзельніц аднайменнага клуба, які дзейнічае пры цэнтралізаванай бібліятэчнай сістэме, гатовыя 6 ліпеня расказаць усім ахвотным пра ўласцівасці лекавых траў, паказаць, як іх правільна збіраць, сушыць, заварваць і рыхтаваць з іх разнастайныя стравы. Не абыдзецца ў гэты дзень і без чараўніцтва: травнікі абяцаюць навучыць рабіць травяныя абярэгі і вырабіць ляльку "Кубышка-травніца". Гэтая лялька напоўнена духмянай лекавай травой. Яна сочыць за тым, каб хвароба не пракралася ў дом, абараняе ад злых духаў хваробы і суцяшае ў горы. Ляльку падвешвалі ў доме над калыскай дзіцяці, а калі яно падрастала, давалі пагуляць. Месцам збору траў выбраны лугі каля вёскі Якаўцы. Пакуль будзе ісці таямніцтва, мясцовых жыхароў і гасцей збіраюцца забаўляць самадзейныя творчыя калектывы. Траўнікі сталі ўдзельніцамі новага праекта па адраджэнні самабытных звычаяў палачан. Народныя святы з'яўляюцца неад'емнай часткай нацыянальнай культуры. На жаль, з часам многія добрыя традыцыі, якія служаць аб'яднанню людзей, сталі забывацца. Члены аматарскіх самадзейных калектываў, якіх нямала на Полаччыне, па крупіцах збіраюць і аднаўляюць традыцыі народных гулянняў, захоўваюць легенды і павер'і, звязаныя з тымі ці іншымі святамі ці абрадамі. У гэтым годзе аматарскія калектывы выйшлі з ініцыятывай правесці ў вёсках раёна дзесяць майстар-класаў па правядзенні абрадаў, тым самым удыхнуць у іх новае жыццё. Раённыя ўлады падтрымалі гэту ініцыятыву. Па-старынцы ў раёне маюць намер згуляць "Вяселле", правесці "Хрэсбiны", сабрацца на "Кузьмiнкi" (так на Полаччыне называлі вясковыя пасядзелкі, якія пачыналіся ў лістападзе). А яшчэ на Полаччыне збіраюцца паказаць, як прабабулі пяклі чорны хлеб і варылі сыр, як прадзеды здымалі на Яблычны спас яблыкі, а на Мядовы - загаворвалі пчол. -0-

БЕЛТА