6 красавіка, Мінск /Кар. БЕЛТА/. Падатковая інспекцыя выявіла ў Полацку 1663 пары абутку, не маркіраванай кантрольнымі (ідэнтыфікацыйнымі) знакамі. Пра гэта паведамілі карэспандэнту БЕЛТА ў Міністэрстве па падатках і зборах Беларусі. Ценявы тавар на Br216 млн. выяўлены па выніках пазапланавай аператыўнай праверкі інспекцыяй МПЗ па Полацку. Арганізацыя перавозіла абутак на грузавым аўтамабілі без наяўнасці прадугледжаных заканадаўствам суправаджальных дакументаў. Акрамя таго, тавар не быў маркіраваны кантрольнымі (ідэнтыфікацыйнымі) знакамі, хоць у адпаведнасці з заканадаўствам абутак уваходзіць у пералік тавараў, якія падлягаюць маркіроўцы. Па выніках праверкі на абутак накладзены арышт. У Гомелі інспекцыя МПЗ па Савецкім раёне выявіла ў індывідуальнага прадпрымальніка партыю шэрых мабільных тэлефонаў на агульную суму Br34,4 млн. Тавар не быў маркіраваны кантрольнымі знакамі, на яго адсутнічалі дакументы, якія пацвярджаюць набыццё. Тэлефоны прадаваліся на адным з рынкаў Гомеля ў гандлёвым аб'екце індывідуальнага прадпрымальніка. Акрамя таго, пры праверцы аб'екта выяўлены факт прыцягнення індывідуальным прадпрымальнікам да сваёй дзейнасці найманага работніка, які не з'яўляецца блізкім сваяком. Гэта кантрольнае мерапрыемства праведзена пры адпрацоўцы інфармацыі, атрыманай з Інтэрнэту. Яшчэ адзін факт ценявога бізнесу выяўлены ў Брэсцкай вобласці. Інспекцыямі МПЗ па Брэсцкай вобласці ў выніку праверкі накладзены арышт на аўтамабіль і мабільныя тэлефоны агульным коштам Br420 млн. Метадам кантрольнай закупкі ўстаноўлены факт незарэгістраванай прадпрымальніцкай дзейнасці. Грамадзянін дастаўляў і рэалізоўваў, выкарыстоўваючы аўтатранспартны сродак, мабільныя тэлефоны без рэгістрацыі ў якасці індывідуальнага прадпрымальніка. Матэрыялы праверкі накіраваны ў Гаспадарчы суд для прыняцця рашэння.-0-

БЕЛТА