Беларусь і Турцыя зацікаўлены ва ўсталяванні і развіцці прамых кантактаў паміж ВНУ і навуковымі арганізацыямі. Пра гэта ішла размова на сустрэчы, якую міністр адукацыі Беларусі Ігар Карпенка правёў у Савеце па вышэйшай адукацыі Турцыі, паведамілі БЕЛТА ў прэс-цэнтры Міністэрства адукацыі.
Падчас сустрэчы асаблівая ўвага была нададзена таму, каб студэнты і спецыялісты з Беларусі і Турцыі мелі магчымасць удзельнічаць у мерапрыемствах, накіраваных на дэманстрацыю адукацыйнага, навукова-тэхнічнага і інавацыйнага патэнцыялу дзвюх краін. "Адным з прыярытэтных напрамкаў беларуска-турэцкага супрацоўніцтва з'яўляецца ўсталяванне і развіццё прамых сувязяў паміж установамі вышэйшай адукацыі і навуковымі арганізацыямі", - адзначылі ў прэс-цэнтры.
Ігар Карпенка знаходзіўся ў Турцыі ў складзе дэлегацыі Беларусі. Акрамя перамоваў у Савеце, які курыруе дзейнасць усіх дзяржаўных і прыватных устаноў адукацыі краіны, а таксама пытанні міжнароднага супрацоўніцтва, ён сустрэўся з міністрам нацыянальнай адукацыі Турцыі Зія Сельчуком. Абмяркоўваліся прававыя асновы двухбаковага ўзаемадзеяння ў сферы адукацыі.
У міністэрстве расказалі пра сутнасць міжурадавага пагаднення аб супрацоўніцтве ў сферы адукацыі, якое падпісана падчас афіцыйнага візіту ў Турцыю Прэзідэнта Аляксандра Лукашэнкі. Пагадненнем прадугледжваецца ўсталяванне і развіццё двухбаковых сувязяў паміж установамі адукацыі абедзвюх дзяржаў, абмен вопытам у галіне развіцця сістэмы адукацыі, выкарыстання новых тэхналогій. Беларусь і Турцыя маюць намер таксама абменьвацца студэнтамі і выкладчыкамі, навукоўцамі ВНУ, прадастаўляць месцы для атрымання вышэйшай і паслявузаўскай адукацыі ва ўстановах адукацыі. Бакі плануюць інфармаваць адзін аднаго аб узаемным прызнанні дакументаў аб навучанні, адукацыі і аб навуковых ступенях. Пагадненне стварае неабходныя прававыя асновы для пашырэння і паглыблення кантактаў паміж краінамі па ўсім спектры напрамкаў адукацыйнай дзейнасці, прыцягненні турэцкіх грамадзян на навучанне ў Беларусі.