Хто дамогся прарыву ў працэсе навучання і выхавання, як праводзіць дапрафесійную падрыхтоўку, якія ўстаноўкі павінны быць у кожнай школы — такія пытанні абмяркоўвалі педагогі Віцебскай вобласці на тэматычным семінары ў абласным інстытуце развіцця адукацыі.
Хто дамогся прарыву ў працэсе навучання і выхавання, як праводзіць дапрафесійную падрыхтоўку, якія ўстаноўкі павінны быць у кожнай школы — такія пытанні абмяркоўвалі педагогі Віцебскай вобласці на тэматычным семінары ў абласным інстытуце развіцця адукацыі.
Усё – у скарбонку дасягненняў
На гэтым зрабіў акцэнт начальнік галоўнага ўпраўлення па адукацыі аблвыканкама Дзмітрый Хома. Кожная школа вобласці павінна ўносіць свой пасільны ўклад у агульную скарбонку поспеху сістэмы адукацыі. Калі ў цэлым Віцебская вобласць дэманструе добрыя дасягненні ў алімпіядным руху, здачы цэнтралізаванага тэсціравання і паступленні ў сярэднія спецыяльныя і вышэйшыя навучальныя ўстановы, то па асобных школах пытанні маюцца.
Аптымізацыя яшчэ будзе праходзіць, гэта непазбежны момант у развіцці сферы адукацыі, але яна накіравана на ўдасканаленне сістэмы. І цешыць, што ў раёнах школы, якім у паляпшэнні матэрыяльнай базы дапамагае аблвыканкам, не проста карыстаюцца такой магчымасцю на карысць дзяцей, але і даюць адпаведны вынік. У якасці прыкладу Дзмітрый Хома назваў Дубровенскую сярэднюю школу, дзе некалькі гадоў таму з'явіўся клас робататэхнікі. Сёння дзеці з гэтай установы адукацыі могуць канкурыраваць са сваімі аднагодкамі з абласнога цэнтра, дэманструючы высокую падрыхтоўку ў «зносінах» з робатамі і іх праграмаванні.
Што тычыцца прадметных алімпіяд, то Віцебскай вобласці яшчэ ёсць куды расці. За апошнія гады наша вобласць па колькасці дыпломаў рэспубліканскага ўзроўню выйшла з шостага на чацвёртае месца, аднак патэнцыял ёсць і імкнуцца трэба да большага. Сёлета прыдзвінскія школьнікі дасягнулі паказчыка амаль 45% па колькасці заваяваных прызавых месцаў на алімпіядзе (ад агульнай колькасці ўдзельнікаў з нашай вобласці).
– Гэта нядрэнны паказчык, – адзначыў Дзмітрый Леанідавіч, – але нам трэба як мінімум 50%.
Такім чынам, неабходна ўзмацніць падрыхтоўку дзяцей па прадметах, знайсці стымулы для паспяховых вучняў і заахвочваць удзел у алімпіядах.
Важная ратацыя кадраў
Сур'ёзна трэба аднесціся і да працы з кадравым складам, падкрэсліў Дзмітрый Хома. Маладых спецыялістаў трэба замацоўваць на першым працоўным месцы, і галоўнае ўпраўленне па адукацыі мае для гэтага ў тым ліку і фінансавыя магчымасці.
– Тэндэнцыя такая, што калі на першае працоўнае месца прыходзіць малады педагог, яму, як правіла, даюць навучальную нагрузку ў 20 гадзін, у наступным годзе ў лепшым выпадку – 25, – заўважыў Дзмітрый Леанідавіч. – Але калі настаўнік энергічны, гарыць жаданнем расці далей, застацца на сваёй ніве, то кіраўніцтва школы абавязана дапамагчы яму. Напрыклад, можна хадайнічаць аб датэрміновым прысваенні кваліфікацыйнай катэгорыі, што пацягне за сабой і павелічэнне заработнай платы.
На месцах варта правесці аналіз кадравага складу. Дасведчаных педагогаў, якія і на пенсіі не пакідаюць свой важны і адказны пост, неабходна нацэліваць на тое, што іх працоўная нагрузка будзе паступова размяркоўвацца на больш маладых калег. Вобласць павінна ісці на амаладжэнне педагагічнага складу.
– Ніхто не прымяншае заслуг настаўнікаў са значным вопытам, аднак трэба рыхтаваць моладзь не толькі да педагагічнай, але і да кіраўніцкай працы, – лічыць Дзмітрый Хома.
Патэнцыял пачаткоўцаў педагогаў вялікі, і трэба яго ў час заўважыць і прасунуць, зацікавіць выпускніка педагагічнага ўніверсітэта, утрымаць на першым працоўным месцы.
У бізнес са школьнай парты
Таксама на сустрэчы педагогаў абмяркоўвалі магчымасці дапрафесійнай падрыхтоўкі ў школах. Так, у абласным інстытуце развіцця адукацыі можна атрымаць карысную інфармацыю, у тым ліку метадычкі па арганізацыі пазакласных заняткаў па прадпрымальніцтве – так званай школы бізнесу.
Дзяржава зацікаўлена ў тым, каб інтэнсіўна развіваўся і амаладжаўся малы бізнес. Прыватны сектар эканомікі мабільны, здольны хутка рэагаваць на змены попыту насельніцтва, уключаючы замежнага спажыўца. Але для таго, каб пісьменна арганізаваць сваю справу, трэба ведаць, з чаго пачаць, як правесці даследаванне рынку, якія дакументы неабходныя, вывучыць магчымасці.
– У школе закладваюцца прафесійныя якасці ў многіх прафесіях: існуюць медыцынскія, аграрныя, педагагічныя класы, – расказала начальнік упраўлення выхаваўчай, ідэалагічнай, сацыяльна-педагагічнай і псіхалагічнай работы ВАІРО Іда Сіднікова. – Тыя ж прынцыпы можна выкарыстоўваць і ў актывізацыі прадпрымальніцкай жылка вучняў, эканамічным выхаванні школьнікаў. У нашым інстытуце мы навучаем настаўнікаў, якія, як вядома, далёкія ад прадпрымальніцкага асяроддзя, як праводзіць пазакласныя заняткі, арганізоўваць вучэбныя бізнес-кампаніі, аб'ядноўваць дзяцей па інтарэсах, прасоўваць ідэі вучняў.
Напрыклад, на дадатковых занятках хлопчыкі і дзяўчынкі могуць даведацца, як складаць бізнес-план, распрацоўваць асноўныя мерапрыемствы, весці дакументацыю, шукаць рынкі збыту і сыравінныя базы. Усё гэта будзе ўкараняцца ў форме імітацыйнай мадэлі, бо практычная частка, якая ўключае тонкасці падаткаабкладання і выплаты заработнай платы, для дзяцей такога ўзросту яшчэ складаная. Хлопцы праз своеасаблівую гульню ў бізнесменаў асвояць азы, а ўжо да моманту заканчэння ўстановы адукацыі вызначацца, якую нішу хочуць заняць.