Тыдзень фінансавай пісьменнасці дзяцей і моладзі пройдзе ў Беларусі з 27 сакавіка па 2 красавіка, паведамілі БЕЛТА ва ўпраўленні інфармацыі і сувязяў з грамадскасцю Нацыянальнага банка Беларусі.
Тыдзень фінансавай пісьменнасці дзяцей і моладзі пройдзе ў Беларусі з 27 сакавіка па 2 красавіка, паведамілі БЕЛТА ва ўпраўленні інфармацыі і сувязяў з грамадскасцю Нацыянальнага банка Беларусі.
"У гэтым годзе мерапрыемства, арганізаванае пад патранажам Нацыянальнага банка ў рамках глабальнай ініцыятывы Global Money Week, пройдзе пад лозунгам "Вучыся. Зберагай. Зарабляй". Галоўная мэта GMW-2017 - пазнаёміць маладых людзей з правіламі фінансавых паводзін, навучыць іх прымаць разумныя фінансавыя рашэнні, расказаць аб правілах зберажэння і пашырыць веды моладзі аб магчымасцях атрымання даходу", - падкрэслілі ў Нацбанку.
Глабальным каардынатарам праекта выступае Міжнародная арганізацыя фінансавай адукацыі дзяцей і моладзі (Child and Youth Finance International, CYFI).
У Беларусі ў арганізацыі і правядзенні Тыдня фінансавай пісьменнасці па традыцыі прымуць удзел міністэрствы і ведамствы, банкі, фінансавыя арганізацыі, установы адукацыі, профільныя асацыяцыі ўдзельнікаў фінансавага рынку.
"Як і ва ўсім свеце, GMW-2017 у Беларусі стартуе 27 сакавіка з сімвалічнага адкрыцця дзецьмі ўдарам у званок біржавых таргоў у ААТ "Беларуская валютна-фондавая біржа". Праграмай беларускага Тыдня фінансавай пісьменнасці прадугледжаны правядзенне анлайн-канферэнцыі паміж беларускімі школьнікамі і іх аднагодкамі з Румыніі і Македоніі, якія падзеляцца вопытам распараджэння асабістымі фінансамі і раскажуць аб інструментах зберажэння для школьнікаў, прэзентацыя новай дзіцячай кнігі-казкі па фінансавай пісьменнасці, урокі фінансавай пісьменнасці на тэму важнасці зберажэнняў у школах краіны і шэраг іншых мерапрыемстваў", - расказалі ва ўпраўленні інфармацыі і сувязяў з грамадскасцю.
Акрамя таго, дзеці і моладзь Беларусі змогуць паўдзельнічаць у міжнародных конкурсах, якія будуць праводзіцца Міжнароднай арганізацыяй фінансавай адукацыі дзяцей і моладзі.
CYFI дзейнічае з 2012 года як міжнародная некамерцыйная арганізацыя для аказання дапамогі ў вырашэнні фінансавых праблем дзяцей і моладзі ва ўсім свеце. Нацыянальны банк Беларусі ўстанавіў партнёрскія адносіны з CYFI у 2013 годзе. У мінулым годзе CYFI уручыла Нацбанку спецыяльную прэмію за значныя поспехі пры правядзенні Тыдня фінансавай пісьменнасці дзяцей і моладзі.