18 сакавіка, Мінск /Кар. БЕЛТА/. Тыдзень фінансавай пісьменнасці школьнікаў праходзіць у Беларусі з 16 па 21 сакавіка. Аб гэтым карэспандэнту БЕЛТА паведаміла начальнік аддзела фінансавай пісьменнасці ўпраўлення рэгулявання небанкоўскіх аперацый Нацыянальнага банка Юлія Саковіч.
"Важнай часткай праводзімай работы па павышэнні фінансавай пісьменнасці насельніцтва з'яўляецца фінансавая адукацыя падрастаючага пакалення. Значнасць работы па фінансавым навучанні моладзі ацэнена ва ўсім свеце. Аб гэтым сведчыць святкаванне ў многіх краінах 16 сакавіка Міжнароднага дня фінансаў дзяцей і моладзі. Нацыянальны банк прыняў рашэнне далучыцца да гэтай падзеі і ў перыяд з 16 сакавіка па 21 сакавіка 2013 года правесці тыдзень фінансавай пісьменнасці сярод школьнікаў", - адзначыла Юлія Саковіч. Пэўныя карэкціроўкі ў пачатак тыдня фінансавай пісьменнасці ўнёс цыклон "Хавер". Міністэрства адукацыі накіравала ва ўсе рэгіёны Беларусі тэлеграму аб адмене мерапрыемстваў, звязаных з удзелам дзяцей, 16 сакавіка.
Цяпер умовы надвор'я нармалізаваліся. Па наяўных планах, пры садзейнічанні ГА "БРСМ" навучальныя мерапрыемствы пройдуць у агульнаадукацыйных навучальных установах Мінска, у якіх на працягу тыдня фінансавай пісьменнасці будзе арганізавана навучальная інтэрактыўная гульня для школьнікаў "Фінансавы футбол" у форме спаборніцтваў паміж камандамі. Дзве каманды, пераможцы спаборніцтваў, будуць запрошаны ў Нацыянальны банк на фінальную гульню з уручэннем падарункаў і прызоў (блакноты, ручкі з лагатыпам Нацыянальнага банка, навуковыя калькулятары, простыя калькулятары). Таксама на фінальным мерапрыемстве плануецца раздаць дзецям слоўнікі з асноўнымі эканамічнымі тэрмінамі (адаптаваныя для старэйшых класаў).
"Згодна з планамі работ, прадстаўленымі ў цэнтральны апарат Нацыянальнага банка галоўнымі ўпраўленнямі Нацыянальнага банка па абласцях, на сакавік 2013 года запланавана вялікая колькасць адкрытых урокаў, гадзін інфармавання, выступленняў банкаўскіх спецыялістаў перад навучэнцамі ўстаноў адукацыі і на бацькоўскіх сходах і педсаветах у школах", - паведаміла Юлія Саковіч.
Спецыялісты галоўнага ўпраўлення Нацыянальнага банка па Магілёўскай вобласці актыўна праводзяць заняткі па фінансавай пісьменнасці нават з самымі маленькімі, дзецьмі дашкольнага і малодшага школьнага ўзросту. Пры гэтым методыку правядзення заняткаў па фінансавай пісьменнасці ў дзіцячых садках і школах імі была распрацавана самастойна.
Нацыянальны банк таксама звярнуўся да банкаў Беларусі з просьбай падтрымаць дадзеную ініцыятыву і арганізаваць розныя мерапрыемствы і акцыі, накіраваныя на павышэнне ўзроўню фінансавай пісьменнасці маладога пакалення. Многія банкі адгукнуліся на гэты заклік.
У прыватнасці, ААТ "ААБ Беларусбанк" размясціла на сваім сайце банэр з інфармацыяй аб гісторыі і прычынах узнікнення Міжнароднага дня фінансаў дзяцей і моладзі. Банк актывізуе працу па павышэнні фінансавай пісьменнасці школьнікаў (з уручэннем глосарыяў "Фінансавая азбука ад Беларусбанка") і студэнтаў. Акрамя таго, плануецца апублікаваць артыкулы ў вядучых дзіцячых друкаваных СМІ ("Арляня", "Зорка", "Пераходны ўзрост", "Дзіцячая газета", "Юны ратавальнік", "Сцяг юнацтва") аб магчымых фінансавых праблемах і неабходнасці ўсведамлення фінансавай адказнасці, аб набыцці навыкаў эканоміі грошай і адказным падыходзе да выдаткаў, а таксама аб банкаўскіх прадуктах, якімі можа скарыстацца дадзены сегмент.
ААТ "Белаграпрамбанк" распрацавала і зацвердзіла план мерапрыемстваў па падрыхтоўцы і правядзенні тыдня фінансавай пісьменнасці школьнікаў, у адпаведнасці з якім будзе арганізавана ўдзел прадстаўнікоў банка ў адкрытых уроках, семінарах, лекцыях па пытаннях навучання школьнікаў і студэнтаў асновам фінансавай пісьменнасці. Таксама ў гэтыя дні Белаграпрамбанк плануе правесці Дні імянінніка сярод удзельнікаў рэкламнай акцыі "Дзіцячая зберагальная праграма "Расці вялікі!", а таксама ўручыць банкаўскія плацежныя карткі ўдзельнікам дзіцячага конкурсу "Я спяваю!".
Да мерапрыемстваў па павышэнні фінансавай пісьменнасці дзяцей і моладзі далучыліся і іншыя банкі, сярод якіх ААТ "Белінвестбанк", ААТ "Франсабанк", ЗАТ "Онербанк".
Акрамя таго, на мінулым тыдні стартаваў новы праект газеты "Комсомольская правда" в Белоруссии" сумесна з Нацыянальным банкам і Асацыяцыяй беларускіх банкаў па фінансавай адукацыі дзяцей "Грашовая азбука". Гэта старонка з коміксамі, яркая і маляўнічая інфармацыя, якая ў даступнай форме тлумачыць дзецям, як зарабляюцца, трацяцца і зберагаюцца грошы, якія існуюць магчымасці атрымання даходу, як навучыцца прымаць правільныя фінансавыя рашэнні.
У зацверджаным 17 студзеня 2013 года №31/1 Саветам Міністраў і Нацыянальным банкам плане супольных дзеянняў дзяржаўных органаў і ўдзельнікаў фінансавага рынку па павышэнню фінансавай пісьменнасці насельніцтва Беларусі на 2013-2018 гады, такой мэтавай групе, як дзеці і навучэнская моладзь, надаецца асаблівая ўвага, падкрэсліла Юлія Саковіч. Гэта і ўвядзенне новых факультатыўных заняткаў па вывучэнні пытанняў фінансавай пісьменнасці ва ўстановах адукацыі, і распрацоўка вучэбна-метадычнага дапаможніка "Фінансавая пісьменнасць", і стварэнне серыі навучальных навукова-папулярных ролікаў, якія раскрываюць асноўныя элементы і паняцці фінансавай сістэмы.
"Фінансавая пісьменнасць дзяцей - гэта ўклад у іх будучыню, і надаць гэтаму дастатковую ўвагу проста неабходна. Мы спадзяемся, што вынікам дадзенай працы па павышэнню фінансавай адукацыі маладога пакалення будзе павышэнне ўзроўню жыцця і ўпэўненасць у будучыні, стабільнасць і росквіт эканомікі і грамадства ў цэлым", - адзначыла Юлія Саковіч. Паводле яе слоў, неабходнасць такой працы ўсведамляюць і расійскія калегі. Ужо ў гэтым годзе некаторыя расійскія школьнікі пачнуць вывучаць новы прадмет - асновы фінансавай пісьменнасці. А з 2018 года ён стане абавязковым для ўсіх. Пілотны праект у верасні запускаецца па ініцыятыве Мінфіна ў пяці рэгіёнах. Вывучаць новы прадмет у абавязковым парадку будуць школьнікі з першага да выпускных класаў. Падобныя прадметы ёсць у ЗША, Англіі, Аўстраліі, Германіі.-0-